Tura, Oct 5,2024: West Garo Hills a·jani ning·o donggipa B-Mahal area-ko Deputy Commissioner-ni survey ka·china ge·etaniko on·aniara, B-Mahal jolo songdongenggipa manderangna jajrengsona nangani katta ong·enga ine ‘Save B-Mahal Committee’ parakatenba, Sixth Schedule-ni ning·o donggipa a·a ba area-rangkode, District Council-sa survey ka·na order-ko on·ani ong·a ine parakatskaha.

Joint survey ka·na gita Deputy Commissioner-ni dakchakaniko nanggenchim ong·oba, Sixth Schedule-ko nirokgipade District Council-sa ong·ani gimin Council-ni order-o pangchakesa dakchakaniko on·na nanga. Iandake mamingkoba talataniko on·chenggija, Deputy Commissioner-sa survey ka·na order-ko on·ahani gimin, B Mahal-o songdongenggipa manderang jajrenganiko man·enga, ine Save B-Mahal Committee-ni Chairman Rimjen Ch Sangma parakataha.

Rimjen Sangma-ni parakatani gitade, Deputy Commissioner-ni talataniko on·anio Industrial Park-ko a·bachengatna hectare 250 a·arangko nanggen ine aganaha, indake ong·genchimode, re·anggipa 2020 bilsini May 20 tariko, a·dokni Skotong Minister Conrad Sangma-ni dilachi tom·aniko ong·atanio apsan bak ra·giparangoni GHADC-ni CEM Albinush Marak, Rakesh Sangma aro gipin sakgni IAS officer-rang baksa apsan chanchirimaniko see rakkiani gitade, hectare 5000 a·arang B Mahal area-o bangbang dongkuenga ine parakaniko nikna man·aha.

Uni gimin hectare 250 a·ako nanggen ine DC-ni talataniko on·aniara namen dingtanggrika. Talataniko on·engon, name rongtale ma·sichengna nanga aro chasongni chasongna songdongkamgipa manderangna mai namgniko dakenga, badita a·a nanggen aro badia area ba biapko nangengachim, ma·sina nanga, maina da·alona kingkingba name rongtale talatanirang dongkujaenga ine B-Mahal Committee-ni Chairman parakatskaha.

Sixth Schedule-o chapatako man·gipa a·asa ong·ani gimin jolo songdonggipa manderangna maming talatchenggija, skatang a·ako survey ka·aniara B Mahal-o songdonggipa manderangko changalani ba manderangni Land Rights-ko pe·ani ong·enga. Uni gimin, je development-ko area-ni namdapanina kam ka·enga ong·ode, mamingba donuani gri kam ka·an baksa songdonggipa manderangna name talatchengna nanga ineba Rimjen Sangma parakataha.