Tura, Sept 30, 2024: Tikrikilla-o dongkamgijagipa candidate saksa Open Category-o 2024-25 bilsini MBBS, BDS, BHMS aro BAMS, BUMS aro BASLP-na a·dok sorkarini on·gipa quota-o seokahani gimin, Raksamgre jolni nangrimgimin dingtang dingtang NGO-rangrang, jekai Garoland State Movement Committee (GSMC) Pedaldoba Regional Unit, A chik Indigenous Justice Initiative Forum (AIJIF) Tikrikilla Regional Unit, Garoland State Movement Committee (GSMC) Raksamgre Regional Unit aro Federation of A·chik Freedom (FAF) Pedaldoba Regional Unit jegalatenba, ua candidate-ni bidingo name sandiroktaichina, sorkarini quota-ko ra·pilchina West Garo Hills a·jani Deputy Commissioner-ko didiataha.

NGO-rangni Deputy Commissioner-na badi ka·e sedoatgipa chittio parakatani gitade, Shashi Bushan Singh minggipa mandeni depante Saksam Singh-ara Meghalaya a·doko songdongkamgipa aro a·doko poraigipa chatro ong·jachim, uni atchugipa Jaleswar Prasad Singh, bilsi 20-na skangan Meghalaya a·dokko wate re·angani ja·mano uni nokdango darangba Tikrikilla-o songdongegipa dongjahachim.

Ua candidate-na re·anggipa July 19 tariko Raksamgre Civil Sub-Division-ni Additional Deputy Commissioner (ADC) Ma RD Shira name sandichenggija Permanent Resident Certificate (PRC)-ko on·aha. PRC-ko man·na gitade, komibeoba Meghalaya a·doko bilsi 12 songdonggipa ong·na nangachim ine NGO-rang parakataha.

“Ia candidate-ni pagipana a·a pattako GHADC, 2016 bilsiosa on·ahani gimin da·o bilsi 8-san gapkuenga aro uamangni songdonga
bilsi 12-an gapkujani gimin PRC-ko man·ani ong·kujachim. Ia mande a·doko songdonggipa aro poraigipaba ong·ja, indiba ua Meghalaya a·doko songdongkamgipa me·chikkon bia ka·aha” ine Raksamgre-ni NGO-rang parakataha.

Uni gimin ua candidate-ni kosako ta·raken am·sandianiko dakna ja·kurangko de·china Raksamgre-ni NG-rang Deputy Commissioner-ko didiataha.