Tura, Sept 23, 2024: West Garo Hills a·jani ning·o donggipa Gimegre Deficit UP Skulo Assistant Teacher-na Nengchi A. Sangma-ko kamo join ka·kujachina aro approved ka·achina, GSU Phulbari Unit, dabiangaha.

GSU Phulbari Unit-ni General Secretary
Pangsrang A.Sangma Gimegre Deficit UP Skulni Assistant Teacher-ko join ka·na on·kujachina, Dadenggre-ni SDSEO-ko mol·molataha.

GSU-ni General Secretary Pangsrang A.Sangma, Advertisement-o pangchake jegalataniko dakenba, skanggipa songtangni candidate-ko rakkiode, nambata aro jakaltobata ine Skulni Managing Committee-ko aganenba, Nengchi Sangma-ko kamo join ka·na on·kujachina Dadenggre-ni SDSEO-ko didiataha.

Pangsrang Sangma-ni parakatani gitade, advertisement-o janapani gitade, songtangni candidate-ko skanggipa nichenggen ine on·achim, indiba da·alo maini gimin joltangni sak 4 candidate-rangoniko maina ra·skaja ine GSU sing·doataha.

GSU-ni Secretary ia kajiani kosako maming dakeba Nengchi Sangma-ko kamo join ka·na on·jawa, indiba manigija kam join ka·ode, skulonikon rikongkate galgen ine parakataha.

Gimegre Deficit UP Skulni Assistant Teacher-ko appointment ka·anio maming Merit Basis gitaba ong·ja ine jegalatenba, appointment ka·ode, interview-o nambatgipakosa kamo rakkina nanga aro maini a·sel songtangni candidate-ko ra·gija, gipinko rakkiskaahani gimin, changsatai interview-ko ra·taichina GSU dabiangaha.

Unbaksana, Committee-ni on·gimin, Interview-ni Result-ko mesokchina GSU Phulbari Unit dabiangaha.