Tura, Aug 21,2024:Garo Hills Autonomous District Council (GHADC)-o kam ka·enggiparangna ja 34-ni dormaharangko on·jaengani gimin, August 19 tarikoni asonge jingjengata salgni gapaha.
GHADC-o kam ka·enggiparang, Non Gazetted Employees Association (NGEA)-ni dilanichi, August 19 tarikoni a·bachenge, 23 tarikona Nisan donne, Tura Govt. College Field ba kal·chakram biapo asonge jingjengatengon, gnigipa salona kingkingde, GHADC-ko dilenggipa Authority-rang maming aganchakaniko on·kujaenga ine NGEA-ni President Brithen M.Sangma kobor ra·timgiparangna aganaha.
“Chingni mangni dormaharangko Fifth Pay Commission-o on·china dabie, chinga sal 5 asonge jingjengatna Nisan dongiminko chu·sokatgen, uni gisepon maming ka·dongatani kattarangko GHADC-ni dilgiparang on·ja ong·ode, sal 5-ni ja·manoba, chinga sima ari dongija (Indefinite) jingjengataniko dakangkugen. Chingni dabiako chu·sokatkuja dipetna jingjengataniko dontongjawa” ine Brithen Sangma parakataha.
“Chinga indita bilsina authority-rangni kal·ake fourth pay ba fixed ka·gimin dormahako chakchike ra·chakaha. Indiba ianpakde, chingna fifth pay-ko dormaha on·na nanga, uni gisepon chingna fifth pay-ko dormaha on·kuja dipetna, chinga jingjengataniko dontongjawa. Maina GHADC-o kam ka·giparangna, fifth pay-ko dormaha on·china batanggipa 2017 bilsion a·dokni Governor ge·etaniko on·manaha. Indiba GHADC-ko chalaienggipa EC-rang financial position namjoko, na·simangna fifth pay-ko dormaha on·gen, ine ku·rachakahani gimin, chinga chakchike sengaha. Badita bilsina chinga chakchike chakchikkugen, sengna nanga gita chakchike sengaha, indiba authority-rang ku·rachakatangko chu·sokatkujaha. Indide, chingko kal·ake roa ong·jama” ine NGEA dilgipa sing·doatskaha.
