Tura, Sept 16, 2024:Garo Hills Autonomous District Council (GHADC)-o kam ka·giparang an·tangtangni mangni dormaharangko 5th Pay Commission-o on·china, re·anggipa August 19 tarikoni Tura Govt. College Field-o asonge jingjengata, sal 19 ong·ahaoba, GHADC-ko chalaienggipa Executive Committee, jagittamni dormahako gitcham 4th Pay Commission-osa on·engani gimin, kam ka·giparang ra·chakna man·jae, da·al September 16 tarikoni apsandaken asonge jingjengatangkuna tik ka·aha aro DC-niko permission ra·taiaha ine parakataha.
GHADC-o kam ka·enggipa Non Gazetted Employees Association (NGEA)-ni dilankchi re·anggipa July 30 tariko GHADC-ni CEM-na uamangni dormahako Fifth Pay Commission-o on·china dabie lekka seatahachim. Indiba GHADC-ni dilgiparang knachakjahani gimin, August 19 tarikoni a·bachenge da·alona kingking asonge jingjengataniko dakenga.
“Chinga a·bachengo je dabianiko jinma jak songe ra·chakahachim, chinga uko maming dakeba dingtangatjawa. Jena kingking chingni dabianiko chu·sokatja, uanona jingjengataniko dakanggen. Da·o bisong chingna gitchamni dormahako gitcham scale, 4th Pay Commission-o on·engachim uko chinga ra·chakna man·jaha. Chinga a·bachengonin, 4th pay-ko ra·jawa, fifth pay-kosa ra·gen ine jinma dabiengahani gimin, chinga 4th pay-ko ra·jawa, fifth pay-kosa ra·gen” ine GHADC-o kam ka·giparang parakataha.
“Uamang chingna jagittamni dormahako on·engon, chinga jasani mangmangko fifth pay-o on·china mol·molaha, indiba fifth pay-ko on·na gita bang·a nipiltaianiko dakna nangenga ine jagittam somoiko bi·aha, iako chinga ra·chakna man·jaha. GHADC-ni dilgiparang batanggipa 2018 bilsionin, tangka paisa donggija pa·sike, fund position namjoko na·simangna fifth pay-ko on·gen, na·simang sengkubo ine aganani gimin, chinga bilsi 4 batpile sengaha. Indide, da·alo fifth pay-ko on·na nipiltaianiko dakna somoi ra·aniara tol·gipa ong·jama? ian ra·chakna man·gijani katta ong·a” ine Brithen Sangma aganaha.
“Batanggipa sal somoirangoba uamang ku·rachakronga, indiba chu·sokatja, uni chinga uamangni kattako bebe ra·na aro ka·dongna man·jaha” ineba NGEA-ni dilgiparang agandapataha.
