Baghmara, Sept 10,2024: Batanggipa 2002 bilsini September 9 tariko South Garo Hills a·jani Chokpot Bolchugre-o ANVC bobil dolni chadrapako man·e sianggipa Baghmara-ni gitcham DSP Pechon A.Sangma-ni siani salko September 9 tarik Sombar salo gisik ra·aniko dakangaha.
Ia salko gisik ra·anio Chokpot-ni SDPO K R Marak, OC B.R Marak, dingtang dingtang gadangni dilgiparang aro GSU Chokpot Regional Unit-ni dilgiparangba dongpae bak ra·angaha.
Baghmara-ni gitcham DSP Pechon Sangma sagi 2002 bilsini September 9 tariko Chokpot pulis station-ona kam nangani gimin re·bae, attamchipak Baghmara-ona re·angpilmitting somoio ANVC bobil dol Chokpot Bolchugre ramao timsoe, chadrapanichi sak 6 pulisrang janggitangko gimaataha.
ANVC bobil dolni chadrapako man·e sianggipa pulisrangara Pechon A.Sangma DSP, Padmalachan Sutradhar, Jenur Marak, Sahinson P. Marak, Repingstone L.Kynshi aro Benosik Nongseij ong·achim.
Ia sakdok pulisrang Meghalaya a·dokni manderangna chel·chakaniko on·giparang ong·achim. Uni gimin, uamangni sianganichi Meghalaya a·dokna dal·bea gimaani ong·aha. An·ching uamangko mande ra·an baksa gisik ra·na krachongmota.
