Chokpot, July 13, 2025: Chokpot jolni nangrimgimin dingtang dingtang NGO-rang chong·motan GSU, FKJGP, GSMC, AHAM, CAVC, AYWO, ACHIK aro Nokma of Council Raja Ronggat Unit-ni bol 60 Nokma A·kingni Nokmarang baksa July 12 tarik Sonibar salo Raja Ronggat Nokpante-o tom·aniko ong·ate, Chokpot jolo ong·enggipa obostarangni bidingo chanchirimaniko dakangaha.

Uamangni tom·e chanchirimani miksongara, Chokpot jolo chagrongenggipa manderangni neng·nikarangko namdapatna bilakbate ja·kurangko de·angna adita Resolution-rangko ra·gate donangaha.

Uarangara Chokpot jolo songdongenggipa manderangni chagrongenggipa neng·nikarang jedake re·a doani rama jal·lang namgijarangko ta·rake tarie on·china dabiangna tik ka·angaha.

Unbaksana Chokpot Degree College-ko Captain William Sangma State University baksa affiliate ka·na jotton ka·anio chu·sokkujaengani gimin ba chanchirimangaha.

Uandake ong·engon, niamgri burung bolgrimrangko nosto ka·aniko, Chibima aro chiringrangoniko niamgri an·ching bikotanirangko dontongatna aro uandake dingtang dingtang niamni a·palo kam ka·anirangko champengatna gitaba tik ka·angaha.

NGO-rangni parakatani gitade, Chokpot jolni namgipa Ecology-ko chel·chakna aro ong·telaigipa Environment-ko name ripingna gitaba jinma ku·mongaha.

Unbaksan niamgri songrangona skatang napbaenggipa gipin jatrangko nirok sandigiparang dongjani a·sel niamgri bading chiwalgiparang maming nangchongmotgipa lekkarang gri bajar antirango bading chiwalanirang aro songrangona re·roroe bostu palgiparang batrikrikengani gimin, uarangko champengna gitaba tik ka·angaha.

Iarangni bidingo Chokpot jolni bil gnanggipa Authority-rang aro Nokma-rang rakgipa niamrangko done nirok sandianirangko dakchina didiataniko on·angjolaha.

Una agreba Chokpot Bajar ba Antidamko rongtal an·talanirang dongjani gimin chanchion, Chokpot Civil Sub Division-ko chalaienggipa chong·motan Administration jabol galchakna dingtangmancha biapko sandichina didiangaha.

Iarangna agreba, Tourism-ko namdapatna jolni tourist Spot-rangko name taridapatchina Tourism Department-ko didiangna gitaba NGO-rang, Nokmarang aro songni manderang tik ka·angaha.