Shillong, July 13, 2025: Raja Raghuvanshi-ko so·otani mamlao rim·ako man·gipa sakgni manderangna jamin on·aha ine East Khasi Hills a·jani Superintendent of Pulis (SP) Vivek Syiem, parakataha.

Shillong-ni katchari, Raja Raghuvanshi-ko so·otani mamlao rim·a man·gipa sakgni manderang Lokendra Singh Tomar aro Balbir Ahirwar-na jamino watna katchari rai on·aha ine Assistant Public Prosecutor (APP) Tushar Chanda aganaha.

Tomar-ara Indore songjinmao donggipa nokni te·sani nokgipa ong·achim, ua Raja Raghuvanshi-ko so·otani ja·mano Meghalaya-oni katangpilgipa Sonam Raghuvanshi-na nok para on·e donnuahani gimin uko June 23 tariko rim·aha. Ua Raja-ko so·otani pilak sakkirangko nosto ka·ahachim. Sakgipin Balbir Ahirwar-ara bolni kamrangko ka·gipa aro nokko nitimgipa ong·achim. Uaba Raja-ko so·otani bidingo pilak kattarangko donnugipa ong·achim.

Re·anggipa July 2 tariko sakgipin, Indore songjinmani, property dealer, Shilom James-koba rim·e, sing·sandianiko dakna gita sal 14 Judicial Custody-o donataha. Uaba Raja-ko so·otani sakkirangko donnuanio dos dongachim. Uko changgipin katcharini hearing-o jamin
watnaba donga ine ka·dongenga.

Meghalaya Pulis-ni Special Investigation Team (SIT)-ni parakani gitade, Raja-ko so·otani ja·man, dos dakgipa mande saksa June 16 tariko Madhya Pradesh-oni Uttarakhand-ona katangahachim, indiba uko June 22 tariko Gwalior-o rim·na man·aha.

Uandake, Indore songjinmani tourist Raja Raghuvanshi-ko uamangni honeymoon-na re·bamitting somoio uni jikgipa Sonam Raghuvanshi, May 23 tariko Sorah-o so·ote galanio mongsongbate jak dongahani gimin, Sonam aro gipin sak 6 manderangko Judicial Custody-o donangkuaha.

Ia mamlao mongsongbate jak donggipa Sonam Raghuvanshi aro uni mikchagipa, Raj Kushwaha aro Raja-ko so·otna contract ra·gipa sakgittam manderang Vishal Singh Chauhan, Akash Rajput aro Anand Kurmi ong·achim.

Indake Raja-ko so·otani mamlako mikkangchi chalaiangkuna aro sing·sandianiko dakangkuna gita katchari sakdok manderangko pattoko donkuenga, ine parakataha.