Tura, July 12,2025: Garo Hills Autonomous District Council (GHADC)-o kam ka·enggiparang ja 42-ni dormaharangko man·kujani gimin, kamtangtangko dontongate, sal bongana chong·motan July 7-oni 11 tarikona uamangni man·gni dormaharangko komibeoba bilsisani dormahako on·china dabie Tura Gandhi Park-o asonge jingjengatangaha.

Indita sal somoirangna CEM aro EM-rangni kattako ra·e, “Chinga cha·a ringa gri, gari pari gri re·rurae kamrangko ka·e on·aha. Iniba GHADC-ko chalaienggipa EC-rang, chingni neng·nikaniko aro duk mikchi ong·aniko ma·sichakja. Da·o chingni man·gnirang ja 42 ong·piloba, chinga ja 42 gimikni dormahako on·china dabijaenga, indiba bilsisani dormahakosan on·china dabienga. Chinga ianpakde, jagni ba jagittamni dormahako ra·chakjawa. Chingna bilsisani dormahako on·ahaosa chinga jingjengataniko dontonggen” ine NGEA-ni President Brithen Sangma kobor ra·timgiparangna aganaha.

GHADC-o kam ka·giparangni sal bongana asonge jingjengatani gittamgipa salo GHADC-ni Chief Executive Membor (CEM) Pa Albinush R. Marak, Non Gazeted Employee Association (NGEA)-ni dilgiparangko okamate, uamangni jingjengataniko dontongchina mol·molaha. Indiba uni okamate jingjengataniko dontongchina agananiara kam ka·giparangna dormaha on·na gitade, ku·rachakjaha ine NGEA-ni dilgiparang parakataha.

Uni gisepon uamangni jingjengatani salbonga ong·piloba, uamangni dabianiko on·na gita maming ku·rachakaniko on·jahani gimin, GHADC-ni Non Gazetted Employees Association, re·baenggipa antioba Sombar salonin jingjengataniko dakangkuna tik ka·aha ine Brithen M Sangma parakataha.

Indake ong·genchimoba, mikkang antide salgittam chutti dongani gimin uamang salgnisan jingjengataniko dakangaigen, uni ja·man, dormaha on·ani bidingo GHADC-ni Executive Committee maming ku·rachakaniko on·jagenchim ong·ode, apsandaken salbongana Sit-in Demonstration-ko dakangtaikugen ine NGEA parakataha.