Chokpot, July 12, 2025: South Garo Hills a·jani Chokpot Civil Sub-Division-ni ning·o donggipa, Chokpot Paromgre songo koela cho·aniko dontongatchina, Chokpot jolni nangrimgimin pilak NGO-rang, Member of Parliament (MP) Pa Saleng A.Sangma-ko gronge, Paromgre songo koela cho·anirangko dontongatchina mol·mole segipa chittiko Butbar salo on·ataha.
NGO-ni dilgiparang Pa Saleng Sangma-ko gronge agan golpogrikanio Pa Sangma, “Anga niatgen ine kuchakangaha aro chinga nangrimgimin NGO-rangba koela cho·aniko jegalatenba Paromgre songo koela cho·na man·jawa” ine raken champengataha.
Uni gisepon, manigija koela cho·genchimode, mikkangchi rakbatgipa ja·kurangko de·anggen ine nangrimgimin NGO-rang mikkrakataniko on·ataha.
NGO-rangni parakatani gitade, Paromgre songo koela cho·genchimode, uni sambao donggipa nitogipa burung bolgrimrangna nangchakegen aro mingsinggipa biaprang jedake Redingsi Wari, Wari Chora aro dingtang dingtang tourist biaprang, A·chik a·songko mikkim gnangatgipa chidarerang nosto ong·gen aro chiring chibisikrang tipe songdongenggipa jolni manderangna neng·nikaniko ra·bagen.
Uni gimin, Paromgre songo koela cho·aniko raken champengataha ine nangrimgimin NGO-rangni
General Secretary Nahinshing Sangma parakataha.
Apsandaken, Butbar salo GHADC-ni Chief Executive Member (CEM) Pa Albinush R.Marak-koba gronge, Paromgre songo koela cho·aniko dontongatchina, Chokpot jolni nangrimgimin NGO-rang didiangaha.
Chokpot jolni. nangrimgimin NGO-rang CEM-ko gronge, koela cho·ani bidingo agan golpogrikanio, Pa Albinush Marak-ba koela cho·na gita GHADC, No Objection Certificate (NOC)-ko on·jawa ine ku·rachakataha.
Nangrimgimin NGO-rangni Chokpot Paromgre songo koela cho·aniko jegalatengon, manigija koela cho·na drill ka·genchimode, mikkangchi rakbata ja·kurangko de·anggen ine parakataha.
