Tura, July 11,2025: West Garo Hills a·jani Dadenggre Civil Sub-Division ningo ga·akgipa Selsella Govt. LP Skul, Junior Basic Skulko man·chape, gimik ge 20 Sorkari LP skulrangko Mothers’ Union baksa Education Department Memorandum of Understanding (MoU)-o soi ka·aniko ta·raken ra·galpilchina, Selsella jolni nangrimgimin NGO-rang chongmotan GSU, ASWA, ANYO dolrang baksa Selsella Govt. LP skulni Managing Committee (MDC) aro jolo songdongenggipa manderang jegalatenba, a·dokni Education Minister Rakkam A Sangmana sedoataha.

NGO-rangni Education Minister-na sedoatgipa chittio parakatani gitade, a·dok sorkarini MoU-o soi ka·e, Selsella Govt. LP skul aro Garo Hills-ni ge 19 Sorkari LP skulrangko Tura Mothers’ Union-na pakwataniko ta·raken ra·galpilchina mol·molataha. Selsella Govt. LP Skul aro Junior Basic Skul, ian Selsella jolo gitchambatsranggipa aro sorkarichi chalaienggipa skul ong·a. Adita salrangna skang ia skulko sorkari Mothers’ Union-na pakwataniara Selsella-o songdonggipa manderangna gisik sa·ataniko ra·baaha, maina ia skulara Selsella jolo songdonggipa manderangna namen gamchatgipa ong·achim, janapatenba, kangal cholgrirangna ia skul namen dakchakbea ong·achim. Skigiparangni kamtangtangko name ka·ani kosakon, NGO-chi chalaina on·anikode chinga ra·chakna man·jawa aro ia skulko chu·gimik sorkarian chalaina nanga.

Garo Hills-oni ge 20 sorkari LP skulrangko, NGO-na pakwatanira sorkari skulko private skul pil·atna miksongani ong·a. Indiani Constitution Article 21-o bilko on·ani gitade, skigiparang aro bi·sarang gipinrang gita apsan chelchakani bilko man·paa aro Article 21-A Indiani niam Ama Bak-III-ni ning·o bilko on·manaha, jeon sorkarian lekka poraniko nirok simsakani chu·gimik daito ong·a. Directive Principles of State Policy-o Preamble-ko poraichape kamrangko chu·sokatna, Article 39 (e), 39 (f), Aricle 46 aro Aricle 21, 23, 24-o bi·sarangni namroro silroroanina, dilneng do·mikna chiru a·gatna bilko sorkarini jako on·aha.

Right of Children to Free and Compulsory Education Act, 2009-ni ning·o skulko chalaina, nirok simsakna, niamrangko tarina, skigiparangko kamo rakkina, skulni committee-ko songna chu·gimik sorkarini daito ong·achim, indiba ia bilko ra·seke Mothers’ Union-na pakwatanira sorkari skulrangko Private skul pilatani kamsa ong·enga. Uni gimin, sorkarini MoU-o soi ka·e sorkari LP skulrangko NGO-na pakwataniko ta·raken ra·galpilchina didiataha.

Uni gimin skul committee-rangko ra·jitgija apsan biapon donpilchina mol·molatenba Skul committee-rangko ra·gale, Mothers’ Union-ko skul nirokna donanira, skul committee aro manderangni u·igijao daksrukanisan ong·aia. Right of Children to Free and Compulsory Education Act, 2009-ni Section 21-o Skul committee-ko songgimin ong·a, je niamko skulna on·gimin bilko ja·kongkeani kamsa ong·a, committee-ko ra·galna uamang maming namgija bimingko man·a dongja aro darangba uamangni ko·sako badi ka·a dongkuja, skul committee-ko ra·galaniara lekka porani niamko aro Indiani Niamko pe·anisan ong·a.

Uni gimin manderangni nangnikaniko niroke ka·achina mol·mole, manderangni ku·rangko knachakjaode chinga jrip nie dongjawa. Manderangni nangnikaniko chingna nanga. Mikkangchi manderangni nangnikako nipilna aro MoU-ko ra·galna jasana somai on·enga, uno chu·sokatjaode nangrimgimin NGO-rang, a·songo on·gimin bilko jakkale ja·ku ga·angen ine NGO-rang parakataha.