Resubelpara, July 10, 2025: North Garo Hills a·jani Mendipathar-o donggipa Varun Bevarage Pepsico karkanao jakkalengipa moila gnanggipa aro mitchigipa chiko Rongrang chiringona wate galani a·sel, wilwilao donggipa songni manderangni badi ka·aniko man·soe, Meghalaya Pradesh Youth Congress (MPYC)-ni President Timjim K Momin aro North Garo Hills District Youth Congress (DYC), July 8 tariko ua biapko nina re·angahaon, michigipa karkanani chirangko manderangni jakkalenggipa Rongrang chiringona wate galaniko nikenba, North Garo Hills a·jani Deputy Commissioner-na badi ka·doangaha.

MPYC-ni badi ka·a ja·man, kobor ra·timgipa manderang Bristibar salo ua biapona re·ange nion, Pepsico karkanao jakkalgipa moila gnanggipa chirangko Rongrang chiringona home-pipe tarie wate galaniko nikaha.

Iani bidingo MPYC-ni DC-na seatgipa chittio janapani gitade, Meghalaya Industrial Development Corporation-ni chalaienggipa Varun Beverages Ltd. Pepsico karkanani moila gnanggipa aro mitchigipa chiko Rongrang chiringona watengani a·sel Hatibasi, Soksan aro sepangjolo donggipa songni manderang, gama ge·ani, dingtang dingtang kamrangna, au-miksuna jakkalani aro a·rankario chiakol kite jakkalanio neng·nikani aro kenchakani ong·enga, maina Pepsico karkana-ni moila gnanggipa chiko wate galani a·sel, jolni manderang jakkalna aro na·tok na·bat rim·e cha·na gita namjajok ine parakataha.

“Chinga jolo donggipa manderangni badi ka·aniko man·soe, ua biapona re·ange nieon, karkanani moila gnanggipa aro mitchigipa chiko, Rongrang chiringona wate galaniko nikaha” ine DYC-ni President kobor ra·timgiparangna aganaha.

Ua chiringko jakkalenggipa Hatibasa aro Soksan jolo donggipa manderangni aganani gitade, ia chiko jakkalani ja·man bang·a manderang, be·enrang ka·kita, mesaka aro an·gil sa·dikaniko man·enga. Moila gnanggipa chi ong·ani a·sel gama ge·anirangoba namjaha, jila kaanirangba saa ding·aniko man·ani gimin, jolni manderang an·tangtangni be·en bimangna kenchake, ia chiko je nanganinaba jakkalsrangjaha ine songni manderang aganaha.

Ian samtangtango dongengipa sam bolrangnasan ong·aija, bang·a nokdangrangan simsakna nangani ong·enga ineba MPYC, DC-na badi ka·gipa chittio janapataha.

Iandake karkanani moila gnanggipa chiko chiringona wate galaniara, Environmetal Protection Act 1986, Water Prevention and Control of Pollution Act 1974, Violation of the Right to Life and Clean Environment aro uandakgipa niamrangko pe·ani ong·a, ineba MPYC parakataha.

“Uni gimin ia niamrangko ja·rike ta·raken ja·ku de·na nanga aro konta 48-ni gisepon, District Administration, Pollution Control Board aro Health Department, ia biapona re·ange niena nanga. Water Prevention and Control of Pollution Act, 1974-o pangchake, ia karkanani moila gnanggipa chiko wate galaniko ta·raken dontongatna nanga,” ine MPYC, North Garo Hills a·jani Deputy Commissioner-ko didiataha.