Tura, July 9, 2025:Garo Hills Autonomous District Council (GHADC)-o kam ka·giparangni asonge jingjengata Monggolbar-o salgni gapaha. Uamangni tik ka·gimin gita salbonga Sombar-oni Sukrobar salona asonge jingjengatanggen ine parakatenba, uni gisepon maming ka·dongataniko on·ja ong·ode, sima-ari dongija, “indefinite Sit-In-Demostration”-ko dakanggen ine parakataha.

“Chinga ja 42 gimikni dormahako changsao on·china dabijaenga, indiba chinga ja 12 ba bilsisani dormahakosan bi·enga” ine NGEA-ni President Brithen Sangma aganaha.

“Na·songara ia changoba jagni ba jagittamni dormahako on·oba ra·chakaigenma” ine sing·anina aganchakengon, “Chinga ianpakde, jagni ba jagittamni dormahako ra·chakjawa, chingna bilsisani dormahako on·na nanggen. Chingna bilsisani dormahako on·kujaskal chinga jingjengataniko dontongjawa” ineba Brithen Sangma aganaha.

“Sawa aro maini gimin na·songko Gandhi Park-o sit-in-demostration-ko dakna on·skaja” ine sing·anina aganchakengon, “Hoe chingni authority-rang, chong·motan ruling EC-rang chingna ia Gandhi Park-o asonge jingjengatna gita on·jachim, indiba chinga bachi kate dakskahen, ia Gandhi Park-o, chinga tom·tom asongesa jingjengatgen, darangkoba kajia ka·gija aro chrike a·bokgija, jrip jripsa jingjengatgen. Indiba maini gimin chingna ia Gandhi Park-ko on·na sikja, ukode ma·sija. Ianpakde chingko jegitaba ia biaponiko rikgalchina, chinga katjawa, sikap tangkap ia biapon asonge jingjengatgen, chingko jeba dakchina, iade GHADC-ni biapsa, chinga ia biapko wate gipin biapo dakjawa” ine NGEA-ni President aganaha.

“Na·songna ja 42-ni dormahako on·na man·jani gisepon ruling MDC saksani, tangka guide ra·bite bajar antidamo tangka suale roako Social Mediao viral ong·enga, uko niksoe na·song maiko chanchia” ine sing·anina aganchakengon, “Bani tangkarangko guide ra·bite manderangna sualenga aro banoniko man·a ukode chinga ma·sija, indiba ruling MDC saksani tangka sualako nikosoe, chinga namen duk ong·a. Chinga ja 42-ni dormahako man·jani gimin asonge jingjengatengon, chinga indakgipa kamrangko niksoe namen duk ong·a” ine Sangma aganaha.

GHADC-o kam ka·giparangni asonge jingjengatani gnigipa salo, warachakenggipa dolni MDC-rang, jingjengatenggipa biapona re·ange, uamangna bil jakchi dakchakaniko on·na man·jaoba, ku·rang on·pae, ruling EC-na aro a·dok sorkarina na·simangni neng·nikaniko u·iate didiatpagen ine agan-ku·pattie chakpaaniko on·angaha.