N.Tura, July 8,2025: Tura Garo Hills Autonomous District Council (GHADC)-ni ning·o bading chiwalenggipa petrol pump, mobile company aro bank-rangko man·chape dingtang dingtang company-rang, uni Recommendation-ko ra·e Trading by Non-Tribal (TNT) licence-ko tarichina Tura-ni MDC Bernard N Marak didiataha.

Marak-ni parakatani gitade, GHADC-ni ning·o ga·akgipa Tura town-ara Indian Constitution-ni Sixth Schedule-o ga·akgipa biaprang ong·ani gimin Sixth Schedule-ni niamrango pangchake, bading chiwalgipa pilakan Non-Tribal company-rang, TNT licence dongna nangchongmota.

“Anga indake talataniko on·na sika chong·motan, Tura town-ni ning·o chalaienggipa bank-rang, petrol pump-rang, mobile company-rang aro uandakgipa company-rangna da·o dipet anga Recommend ka·e on·ani dongkuja. Angni Tura constituency-o chalaienggipa dingtang dingtang bank, petrol pump aro mobile company-rangni Manager-rang baksa tom·e, talatanirangko on·e, nanga gita ja·kurangko de·na miksongenga” ine Marak parakataha.

Tura GHADC constituency-ni ning·o TNT licence gri chalaienggipa bank-rang, petrol pump-rang aro mobile company-rang dongengnaba gnang, ine janapatenba, Sixth Schedule-ni niamo pangchake, je company-rangan Tura GHADC constituency-ni ning·o iandakgipa kamrangko ba bading chiwalanirangko dakengachim, pilakan MDC-ni Recommendation-ko ra·e TNT licence-rang dongna nanggen ine Marak parakataha.

“Uni gimin na·simang angni Recommend ka·gimin TNT licence dongama dongja ba TNT licence-na dorgasto galama galkuja, uko angna seachi u·iatchina mol·molatenga,” ine Tura-ni MDC, uni constituency-ni ning·o chalaienggipa dingtang dingtang bank, petrol pump, mobile company aro uandakgipa company-rangna u·iataniko on·ataha.