Shillong, July 2: Indore songjinmani badinggipa Raja Raghuvanshi-ko so·otani bidingo sakkirangko nosto ka·e galanina Shillong-ni katchari Butbar salo sakgittam manderangko pattoko dona raiko on·aha.

Uaranga Shilom James, Lokendra Singh Tomar, aro Balbir Ahirwar-ko pulisrangni ning·o sing·sandina sal 6 donani ja·mano, Chief Judicial Magistrate-ni katchario mikkang pa·atenba, Investigating Officer, sakgittam manderangko sal 14-na pattoko donchina bi·aha. Uandake Shilom James-ko sal 14-na aro Lokendra Singh Tomar aro Balbir Ahirwar-ko sal 7-na pattoko donna katchari raiko on·aha ine Assistant Public Prosecutor Tushar Chanda kobor ra·timgiparangna aganaha.

Shilom James-ara dalalini kamko ka·e, Raja Raghuvanshi-ko so·otanio mongsonggiparangoni saksa ong·achim. Ua, Vishal Singh Chauhan-na nok para tik ka·e on·aha. Lokendra Singh Tomar-ara Madhya Pradesh-ni Gwalior-o donggipa ong·a, jean Sonam Raghuvanshi-ni dongnue chakgipa nokni nokgipa ong·achim, aro Balbir Ahirbar-ra ua nokko nitimgipa ong·achim.