Tura, July 1, 2025: Confederation of Meghalaya Social Organisation (COMSO)-ni bimango Garo Hills-ni dingtang dingtang NGO-rang jekai Garoland State Movement Committee (GSMC), A·chik Progressive Approach (APA), United A·chik Socio Economic Justice Forum (UASEJF) aro Rajaballa jolni nangrimgimin NGO-rang baksa Mirjulla Out Post, Monabari Pulis Station, Singgimari, Rajaballa, Bajengdoba, Mendi, Dainadubi Pulis Station-rang aro Out Post-rangni officer-rangko gronge, gipin a·dokoni Garo Hills-ona napsrukbaenggipa manderangko chel·chaksona gita apsan ja·ku de·angna ku·mongangaha.
COMSO-ni Publicity Secretary Tony Tojrang B.Marak-ni parakatani gitade, COMSO-ni dilgiparang baksa NGO-rangni dilgiparang dingtang dingtang biaprangona re·roroe, sing·sandianiko dakaniara gipin a·songoni napretbaengipa manderangko chel·chaksona, Indian Constitution-ni a·brio songdonggipa jatrangna on·gimin bil, Sixth Schedule-ko nosto ong·gija name aro kimkim ong·e ripingna, Indigenous Rights-ko tange ripingangkuna, mongsongbate A·chik A·songko chel·chakna ja·ku de·ani aro re·mikkangani ong·a.
Meghalaya a·dokko man·ani miksongara Garo, Khasi aro Jaintia a·jarangko name ripingna, Meghalaya a·dokni mongsonggipa jat gittam manderangni a·jarangko gipin jatna on·gija, bilake rakkina miksonge COMSO re·chakatenga, ine Marak parakataha.
Meghalaya aro Assam a·dokni sima-arirang gita, gipin a·songni manderang niam napsruke songdong a·chaanirangko champengna aro uamangko a·songtangchi watatpilna COMSO raken ja·kurangko de·enga ine janapatenba, sima-ari jolrango donggipa Pulis station-rang aro out post-rang, on·tisaba miktuatgija, namedake sandianirangko dake chel·chakanirangko dakchina COMSO, Pulis officer-rangko didiangaha.
