Shillong, June 29, 2025: Indore songjinmani Raja Raghuvanshi-ko so·otani bidingo, Meghalaya Pulisni Special Investigation Team (SIT) Sonam Raghuvanshi aro Raja Raghuvanshi-niko cha·ugipa sonarang aro sakkirangko Madhya Pradesh-ni Ratlam a·jaoniko Shilom James-ni mamagipa ba obitegipani nokoniko Robibar salo man·aha.

SIT-ko dilenggipa Anthony Khongsit aro SI Karan Pachua-ko Alkpuri Pulis Station-ni officer-rang aro manderang dakchakaha ine East Khasi Hills-ni Superintendent of Pulis, Vivek Syiem parakataha.

Sona-rangna agreba, laptop, pendrive aro sakki gnanggipa lekkarangko SIT, ua nokoniko man·aha.

Raja Raghuvanshi-ko so·otani bidingo Meghalaya Pulisni Indore songjinmaona re·angani gittamgipa chang ong·aha. Meghalaya pulisrang Shilom James baksa Indore-ona Sonibar walo sokeaha aro Mahalaxmi Nagar-o donggipa uni nokoniko sandina gita re·angaha. Unoni uamang Ratlam-ona re·ange sonarang aro gipin sakkirangko man·eaha.

Shilom James da·o Meghalaya Pulisni jako ong·enga. Uni kate chakna jotton ka·mitingko pulisrang Dewas a·jani Bhonrasa Toll Gate-oniko June 21 tariko rim·aha. Uko Balbir Ahirbar ba Ballu aro Lokendra Singh Tomar baksa June 26-o Shillong-ona rimbaaha aro sal 6-na pulisni jako donaha. Raja-ko so·otani bidingo sakkirangko kimite galna jotton ka·ahani gimin uamang sakgittamko Meghalaya Pulis rim·aha.