Tura, June 28,2025: Tura Medical College-ko Public Private Partnership (PPP) mode-o chalaina sorkarini tik ka·aniko Manipur a·dokni Imphal-o donggipa Regional Institute of Medical Sciences (RIMS)-ni Association of Meghalaya Medical Students (AMMS), raken jegalataha.
Iani bidingo a·dokni Skotong Minister Conrad K Sangma-na sedoatenba, Tura Medical College-ko PPP mode-o chalaigenchimode, mikkangchi porainagipa chatro chatritrangna mai dakgipa neng·anirangko ra·bagen ine janapatenba, Garo Hills-ni chatro chatrirang, ma·a paarang, skigiparang aro dingtang dingtang NGO-rang baksa a·dok sorkari namedake chanchina nanga ine AMMS janapataha.
Garo Hills-o Medical College-ko kulianinichi a·jatangni chatro chatrirang, gipin biaprangchi re·angna nanggijan biaptango donge poraina chol ong·gnok, uni gimin Tura Medical College-ko sorkarian chu·gimik jako ra·e chalaina nanga, ine janapatenba, Tura Medical College-ko PPP mode-o chalaina tik ka·aniko jegalate AMMS, suk ong·gijaniko parakataha.
“Chinga an·tangtangan medical-ko poraienggipa chatro chatrirang ong·e, a·doktangni manderangna an·seng baljokaniko on·ani aro lekka poraniko on·anio dai nanggiparang ong·a” ine AMMS parakatenba, Tura Medical College-ko Private Company-chi chalaina on·gija, sorkarian chu·gimik jako ra·e chalaichina AMMS dabiangaha.
AMMS-ni parakatani gitade, Tura Medical College-ko PPP mode-o chalaigenchimode, National Medical Commission-ni Sorkari Medical College-rangna dongimin niam gita State Quota-o seat kangani melijawa, maina Sorkari Medical College-rangode, State Quota-o a·doktangni chatro chatrirangna 85% percent seat-rangko donachim, indiba PPP mode-ode 50% percent-kosan a·dokni chatro chatrirangna on·aignok.
Uni gimin Tura gita dakgipa biaprango Medical College-ko kuliani miksongara, chol ong·pagijagipa manderangna cholko on·ani ong·achim, indiba, Tura Medical College-ko PPP mode-o chalaigenchimode, namgipa miksonganirangko pe·ani ong·gnok aro private company-ni man·gnina miksonge kulianisa ong·engjok ine AMMS parakataha.
Indake ong·engon, Tura Medical College-ko chalaiani bidingo name chanchipiltaichina aro Meghalaya a·dokni chatro chatrirangna chanchie ja·kuko de·china, AMMS Skotong Minister Conrad K Sangma-ko didiataha.
