Tura, June 28,2025: West Garo Hills a·jani Raksamgre Civil Sub Division-ni ning·o donggipa Rengegre songni Nennen Rangsa Reknan K.Sangma-ko seburung man·e, segipa Pirot R.Marak-ko ka·saninggija so·ote galaha.

Ua a·sel re·anggipa April 14 tariko ong·aha. Nennen Rangsa aro uni mikchagipa Reknan K.Sangma, Lepson Rangsa aro Sengba Rangsa, Pirot R.Marak-ko so·otaha ine Raksam mahari ma·sioba, songko nokko ding·doatna sikjae, maharirang case ka·gija gope galahachim. Indiba, Pirot sagini adatang ka·a chakna amjae Nennen Rangsa, Reknan Sangma, Lepson Rangsa aro Sengba Rangsa-ni kosako May 7 tariko badi ka·ani ja·mano, pulisrang June 12 tariko Pirot-ni manggisiko bipile, kakketko ma·sina post mortem ka·aha.

Post mortem ka·anio ma·siani gitade, Pirot Marak-ko gittoko sikgekaha aro uni private part-ko binekataha. Indake kragija kal·ake so·otahani gimin, Raksam mahari badi ka·ahani gimin Tikrikilla Pulisrang sing·sandianiko dakna gita, Nennen Rangsa, Reknan Sangma, Lepson Rangsa aro Sengba Rangsa-ko June 24 tariko rim·aha.

Raksam mahari, uamang sakbrian Pirot Marak-ko so·otchongmota ine sakkiko man·ode, uamarangko pasi on·china dabiangaha.

Pulisrang ua sakbri manderangko rim·e salgittamna Pulis custody-o done, sing·anirangko dakani ja·man court-ona watatgen. Indiba sing·sandianirang chu·ongkuja ong·ode, court-o bi·e, Pulis custody-ona rimbapilgen aro rongtale sing·sandianiko dakanggen ine Phulbari Thana-ni Circle Inspector aganaha.

Apsandaken, May 23 tariko tariko Indore songjinmani Raja Raghubanshi-koba, Sonam Raghuvanshi aro uni mikchagipa Raj Kushwaha gipin sakgittam Raj-ni ripengrang Vishal Singh Chauhan, Akash Rajput aro Anand Kurmi, Sorah-o so·ote galataha.

Meghalaya pulisrang sal 8-ni ja·mano, chong·motan June 2 tariko Raja-ni sogimin manggisiko WeiSawdong chidare sambao donggipa a·silangoniko man·aha.

Raja-ko so·otani ja·man, Sonam Indore-ona katangpile nok para ra·e dongnuaha, indiba Raja-ko so·otna contract ra·gipa saksako rim·aha ine koborko man·eba, Sonam Uttar Pradesh-ni Ghazipur Pulisna an·tangko bame on·eaha. Uni ja·mano Meghalaya pulisrang Sonam-ko Shillong-ona rimbae, sing·sandianirang matchotkujani gimin, Sonam aro uni mikchagipa Raj Kushwaha-ko sal 13-na Judicial Custody-o donataha aro gipin sakggitam manderangko sal 14-na Judicial Custody-o donatskaha.

Uni ja·mano Meghalaya pulisrang, Sonam-na nok para on·gipa, nokni security guard aro Sonam-ni jola aro bosturangko so·e galgipa sakgittamko rim·dapaha aro uamangko, Shillong-ona rimbae, sal 6-na Pulis custody-o donataha.

Iandake misilbegipa aro kragijagipa a·selrang East Khasi Hills-ni Sorah-o aro West Garo Hills-ni Rengegre songo ong·aha. Pirot Marak aro Raja Raghuvanshi-ko so·otanio mongsonggipa jak donggipa me·chikrangara Rengegre songni Nennen Rangsa aro Indore songjinmani Sonam Raghuvanshi ong·a. Uamang sakgnian sakgipin me·asako mikchae, segipatangtangko so·ote galaha aro an·tangtangko ong·siaona ra·baha.