Imphal, June 27, 2025: Manipur a·dokni chel·chakgipa sipai dolrang, dingtang dingtang bobil dolrang baksa jak donggipa manderang baksa me·chik saksako man·chape gimik sakgittam manderangko rim·aha ine Manipur pulis Sukrobar salo parakaha.
Rim·a man·gipa me·chikara champengako man·gipa, People’s Liberation Army (PLA) bobil dolni sipai ong·achim aro uko Bristibar salo Imphal West District-ni Haobam joloniko rim·aha.
Senior Pulis official-ni parakani gitade, ua me·chik tangka dabie ra·anio aro dingtang dingtang sorkari official-rangko ka·mikkenate tangka dabidrae ra·an baksa Manipur jolo donggipa Courier Service Operator-rangko ka·mikkenatanio jak dongachim.
Ua apsan salon, Kangleipak Communist Party (PWG) bobil dolna kam ka·gipa member saksako Imphal West-o donggipa Samurou-oniko rim·askaha. Uaba a·kawe jolrango donggipa manderangoniko tangka gildrae ra·rongachim. Uni jakoniko pistol ge·sako pulisrang man·aha.
Uandake Butbar saloba chel·chakgipa sipairang dingtang dingtang dake am·sandianiko dakanio, PREPAK bobil dolni sipai saksako Imphal East District-ni Khurai Thangjam Leikai joloniko rim·aha. Ua mande silai ra·bite songdonggipa manderangko ka·mikkenatrongachim. Uni jakoniko pistol ge·sa aro guli barutrangko man·aha ine pulis official aganaha.
Rim·a man·gipa manderangko pulus custody-o donenga aro uamangko sing·sandienga ine pulis official parakaha.
