Shillong, June 24,2025: Re·anggipa June 19 tariko Education Department aro Tura Mothers’ Union baksa ku·monge sorkari skulrangko chalaina Memorandum of Understanding (MoU)-ko bilsi 5-na soi ka·aha.

Ia MoU-ko soi ka·ani a·sel skigiparang, mongsongbate, West Garo Hills a·jani skigiparang uamangni dormahararang aro kam ka·anirango neng·nikanirangko man·naba donga ine jajrengani gimin, Education Minister Rakkam A Sangma, ia MoU-ara sorkari skulrangko dakchakna ku·monganisa ong·a aro department-ni kamrang aro skigiparangni man·gnirangko maming dakeba ra·e katjawa ine talataniko on·ataha.

Indake education department aro Mothers’ Union dolgni ku·monggrikani gisepon, skulrangko chalaiani kamrangko aro tangkarangko sorkari Mothers’ Union-ni jako on·gen aro skulni daka rikani, chalaiani, skie on·ani aro skigiparangni kam ka·anirangko nirokatgen. NGO-ni kamara skulko chalaianisan ong·aigen aro skigiparangni dormaharang aro kam ka·anirang aro kamo rakkianirangkode Mothers’ Union jako ra·jawa ine Sangma talataha.

“Dormahakode pangna on·ronga gita sorkarian on·gen, iano mamung dingtangani dongjawa. NGO-ni kamde Skul Management Committee-ni (SMC) kam gita apsanaigen,” ine Education Minister aganaha.

Una agreba, bang·a sorkari skulrang, mongsongbate songadamrango, skulrangko name chalaija aro chatro chatrirang komia baksa skigiparangba chel·bea biaprangonisa re·batokani gimin skulko name nirokani dongja, iani a·sel gital bewalrangko ja·rike sorkari skulrangko namdapatna jotton ka·enga ineba Sangma aganaha.

Mothers’ Union-o kam-oni neng·takgimin skigiparang aro officer-rang donga aro uamang, adita skulrangko namdapatna, nitoatna, chatro-chatrirangko bang·bate skulona re·baatna aro songni nokni manderang baksa kam ka·rimna jako ra·enga. Ian a·doko lekka poraianiko namdapatna aro National Performance ranking-rango tang·doatna a·dok sorkarini kam ka·ani ong·a.

Sorkarini nangnika gita NGO kamrangko ka·jagenchimode, je somoioba ia soi ku·monggrikaniko dontongatna man·a ine MoU-o janapaha. Una agreba, parake kam ka·ani, report-rangko tariani aro kamoni senggnang dontongani giminba MoU-o janapaha.