Shillong, June 24, 2025: Meghalaya Pulisni Special Investigation Team (SIT), Raja Raghuvanshi-ko so·otani bidingo am·sandianiko dakanio, Madhya Pradesh Gwalior-oniko Lokendra Singh Tomar-ko Sombar salo rim·taiaha.
Rim·a man·gipa mandeara, Sohra-o Raja-ko so·otanio, mongsonggipa jak donga ine Sonam-ko donnugipa nokni nokgipa ong·achim.
East Khasi Hills a·jani Superintendent of Pulis Vivek Syiem-ni u·iatani gitade, Tomar, re·anggipa June 16 tariko Madhya Pradesh-oni Uttarakhand-ona re·angenba, June-ni 22 tariko Gwalior-ona re·bapilaha. Meghalaya pulis SIT-ni mol·molani gimin, Gwalior pulis uko rim·aha.
SIT da·o Tomar-ko officially rim·an, baksana Meghalaya a·dokona rimbae, sing·sandianiko dakna katchari-oni ge·etaniko ra·na Gwalior-ona re·angaha.
Tomar, Raja Raghuvanshi-ko so·otanio dos dakgipa mandeko donnuna dakchakan baksana so·otani mongsonggipa sakkirangko nosto ka·e galgipa ong·achim. Sonibar walosan, a·a aro gam jinrangko tik ka·e on·gipa, Shilom James-ko aro security guard ba nokko nitimgipa, Balbir Ahirbar jekon, Ballu ineba mingachim, uko Robibar salo rim·aha. Butbar salo rim·a man·gipa sakgittam manderangko pulisrang Shillong-ona rimbae sing·sandianiko dakna miksongenga.
Shilom James-ni agananio pangchake, Meghalaya pulisrang Robibar salo so·e galgimin, jola gisim-ko Indore-oniko man·aha. Ua so·gimin jolara, Raja-ko so·otani ja·mano Sonam-ni ra·bitgipa ong·na nanga ine pulisrang chanchichipenga.
Koborni gitade, ua jolao bang·a tangkarang baksana jewellery aro uni mobile phone dongachim. Talbate ma·sina gita pulisrang, so·e galgimin jolani bosturangko forensic-chi porikka ka·e nina gita watataha.
Raja Raghuvanshi-ko so·otani bidingo pulisrangni am·sandianio rim·a man·gipa manderang da·o gimik sak 8 gapaha.
