Baghmara, June 21,2025: South Garo Hills a·jani Bagangre songo, sorkari skul nokko rikgipa contractor, kam a·bachengatgija donchipengani gimin South Garo Hills-ni social activist Greneth M Sangma, Skul Education & Literacy-ni Director-na badi ka·doangaha.

Sangma-ni parakatani gitade, ua contractor-ara, Tura Fancy Valley-ni M/S Shivin Construction ong·achim. Ua skul nokko rikna gita 2024 bilsini June jaon gong 44,79,448 tangkarangko chamahachim.

Indiba da·alona kingkingan, Da·alonan kamko a·bachengatchipkujaii a·sel ua skulko ramram nokosa chalaina nangenga ine Sangma parakataha.

“Ia skulara, Chokpot C&RD Block-ni Silkigre pulis station-ni ning·o ga·akgipa skul ong·a aro ia skulko 1975 bilsion kulie da·o ia skul bilsi 50 gapengaha. Ia skul nokko da·onaba rikna a·bachengatkujani a·sel skigiparang aro skul bi·sarang neng·nikaniko man·tokenga,” ine Sangma parakataha.

Ia contractor-ni kosako rakgipa ja·kurangko de·china aro una on·gipa work order-ko den·galpilchina DSEL-ko didiatenba ia skul nokko ta·rake matchotatchina ka·dongchakna man·gipa contractor-na on·skachina Sangma mol·molataha.