Shillong, June 21,2025: Raja Raghuvanshi-ko so·otani bidingo pulisrang namedake ma·sina gita am·sandianiko dakahaon, Raja-ko bia ka·na skang ‘Sanjay Verma’ ine Sonam baksa chang 119 phone ka·grikgipa mandeni bimingara Sonam-ni mikchagipa Raj Kushwaha-anchim ong·achim ine pulisrang ma·sina man·aha.

Meghalaya Pulisni u·iatani gitade, sal 39-ni gisepo Sonam-ni phone aro ia number-o phone ka·grikani chang 239 gapaha. Sonam-ni phone-o ‘Sanjay Verma’ ine biming dongipa mandeara, pagipani plywood karkanao Accountant-ni kamko ka·enggipa Raj Kushwaha-an ong·achim, ine Meghalaya pulisrang ma·siaha.

Raj Kushwaha-ko pulisrang, Raja Raghuvanshi-ko so·otna chanchidilgiparangoni saksa mongsonggipa ong·a ine ma·siaha. Sonam aro Raj-ni mikchagrikaniko darangba ma·sijana gita, Raj-ni bimingko ‘Sanjay Verma’ ine donahakon ine pulisrang chanchichipenga.

Ia a·selni bidingo pulisrang ma·sina a·bachenga intalan, Raj Kushwaha-ni mobile phone switch off ong·aiaha. Iani bidingo Sonam-ni adagipa Govind-o sing·sandion, “Sanjay Verma minggipa mandeko anga ma·sija, indiba uni phone sokbarongakosan angade ma·siaia,” ine aganchakaha.

Uni nokdang da·ode, Sonam baksa maming bak dongjaha aro uamangba Raja-ni nokdang baksan kakket bichalna dabienga ineba Govind aganaha.

Indore songjinmaoni bia ka·daldale Meghalaya-ona re·bagipa, Raja Raghuvanshi aro Sonam Raghuvanshi, re·anggipa May 23 tariko gimaaoni salchet ja·mano, chong·motan June 2 tariko Raja-ni sogimin manggisiko, Sohra jolo donggipa Wei Sawdong chidare sambaoniko man·aha. Raja-ni manggisiko man·ani ja·man, Meghalaya Pulis, SIT-ko songe, ia a·selni bidingo sandirokna a·bachengataha aro Raja-ko ka·saninggija so·ote galanina, uni jikgipa Sonam, uni mikchagipa, Raj Kushwaha aro gipin sakgittam manderang Vishal Singh Chauhan, Akash Rajput aro Anand Kurmi-ko pulisrang rim·aha.