Tura, June 18, 2025: Garo Hills Autonomous District Council (GHADC)-o kam ka·enggiparang dormaha man·gija ja 41 gapaha.
Indita bilsirangna GHADC-o kam ka·enggiparangni dormaharangko on·gija, kal·ake roenggipa ine GHADC-ni Executive Committee-ko Non Gazetted Employees Association (NGEA) matnangatenba, “Kal·steke roenga” ine katta bichongko done, A·chik a·songo songdongenggipa A·chik jat sakantina, NGEA-ni President Brithen M.Sangma, GHADC-o kam ka·enggiparangni palo parakataha.
Ian skanggipa GHADC-ni Ma·ambi ong·enga, ine janapatenba, “Chingaba mandean ong·achim, indiba GHADC-ko chalaienggipa ruling EC-ni chingko kal·steke, roaniara ra·chakna man·gijani ong·a. Batanggipa 2015 bilsirango EC-ko chalaigiparangde indake ong·jachim. Indiba 2015 bilsini ja·mande, GHADC-ko chalaienggipa EC-rang da·alona kingkingan chingko kal·steke roengaha”, ine Brithen Sangma matnangataha.
NGEA President-ni parakatani gitade, re·anggipa bilsini December jao jagnini dormahako on·china GHADC-ni ruling EC-ko changni chang mol·molahani gimin, na·simangna da·o tangka donga gimikko bon·e on·ode, January aro February jarangon, skul admission-na na·song hala ka·taigen. Uni gimin, January ba February jao jegita man·a na·simangna dormaha on·gen ine ku·rachakani gimin, kam ka·giparang chu·ongjaoba jasani dormahako December jao ra·chakaha.
Indake, January jagimik sengoba, maming tangka paisani koboran dongjaha aro January jaode, MDC-rang gimikan office re·batokja. Apsandaken February jaoba, dormahani giminde maming kobor dongjani gimin, GHADC-ni EC-rangko gronge, jasanide maming daknan chu·ongjawa, ine jagnini dormahako on·china mol·moltaiahani gimin jagnini order-ko on·aha.
Indiba, da·alona kingking jadok ong·pilengjok, jasani dormahakon bon·e on·kuja, badiaba department-rangde da·onaba jasani dormahakon man·kuja. Indake, kam ka·giparangko cha·bokenga. “Maini a·sel chingko indakpile kal·ake aro cha·boke roenga agannan am·sokpilja. Indita bilsirangna chinga tangka paisa gri neng·nikaniko man·oba, chakchike kamko ka·aha, indiba chingni neng·nikaniko on·tisaba ma·sichakja” ine Brithen Sangma suk ong·gijaniko parakataha.
