Siju, June 18,2025: South Garo Hills a·jani Siju-o rikenggipa Power Distribution Sub-Station-ko adita bilsirangna galchipe donengani gimin, Federation Khasi Jaintia and Garo People (FKJGP), Siju Circle, a·dokni Skotong Minister Pa Conrad K.Sangma-ko Monggolbar salo gronge, chitti sedoangenba, Siju jolo songdongenggipa manderangni namgnina, Siju Power Sub Station-ko ta·rake matchotatchina, a·dokni Skotong Minister-ko didiataha.

FKJGP Siju Circle-ni dilgiparang, re·anggipa 2024 bilsion, ia Power Sub Station-ni gimin janape, a·dokni Education Minister Pa Rakkam A.Sangma aro South Garo Hills a·jani gitcham Deputy Commissioner-na chitti sedoatahachim, indiba da·alona kingkingba, ia Siju Power Sub Station-ni bidingo maming ja·ku de·aniko dakkujaenga, ine FKJGP Siju Circle-ni General Secretary Tuwisbirth R.Sangma parakataha.

Siju-o rikenggipa Power Distribution Sub Station-ko indita bilsirangna galchipe donengani a·sel, buring dikkripilengaha aro ia Sub Station-ko basako rika matchotatgen aro basako chalaina a·bachengatgen, ine FKJGP Siju Circle-ni dilgiparang sing·doangaha.

Siju aro uni wilwilao songdongenggipa manderangna nambate bijoliko sokate on·na man·na gita, ia Power Sub Station-ko ta·rake matchotatchina, FKJGP Siju Circle, a·dokni Skotong Minister-ko mol·molataha.