Shillong, Jun 17, 2025: Indore songjinmaoni re·bagipa tourist Raja Raghuvanshi-ko so·otani bidingo pulisrangni am·sandianirang da·o ta·raken matchotangengaha aro sakkirangko chu·onga gitan man·engahani gimin, ua a·sel ong·anio dosi dakgipa sakbonga manderangni kosako bakan chargesheet ka·na man·gnok ine Sombar salo, Meghalaya a·dokni Director General of Police (DGP) Idashisha Nongrang, parakataha.

Iani bidingo kobor ra·timgiparangna aganengon, Raja-ko so·otanio jak donggipa sakbonga manderangko da·o dipet pulisrangni ning·o done sing·sandianiko dakkuenga aro ia a·selni bidingo kakketko ma·sina puliarang raken kamko ka·enga ine DGP aganaha.

Raja Raghuvanshi-ko so·otanio mongsongbate jak donggipa Sonam aro Raj Kushwaha aro gipin sakgittam manderangko basako a·sel ong·gipa biapona rimanggen, ine sing·anina aganchakengon, da·o dipet iani bidingo tale aganna man·kuja, indiba ia manderangko Mongolbar salon Sohra-ona rimange, uamang maikai Raja-ko so·otaha, uko mesokchina rimangnaba donga ine DGP aganaha.

Raja-ni manggisiko re·anggipa June-ni 2 tariko, Wei Sawdong chidare sambao donggipa chubegipa a·silangoniko man·ahani gimin, ia a·sel ong·anio dos dakgipa sakbonga manderangko, ia biaponan rimange uamang maikai Raja-ko so·otahachim, uko dakmesoke on·china pulisrang rimangna sienga, ineba Nongrang aganaha.