Tura, June 17, 2025: Association for Democracy and Empowerment (ADE) HQ Tura-ni dilgiparang, Rongram-oni Tura Chitoktak-ona National Highway tarienggipa rama namjani gimin, bang·a manderangni complaint-ko man·e, June 14 tarik Sonibar salo National Highways & Infrastructure Corporation Limited (NHIDCL) company-ni Engineer aro Contractor-ko okamate, Rongkhon jolni manderang baksa re·ange nieaha.

ADE dilgiparangni Sonibar salo Rongram-oni Chitoktak-ona, NHIDCL Company-ni rama tariako re·ange nianio ba inspect ka·anio, bang·a kamrangan namjaha ine nikna man·aha.

Bang·bata sorokni kosak aro ka·maoni taridogipa retaining wall-rangko nidik nisi sera bera dake kam ka·aha. Ua retaining wall-rangko mangrakatna chu·onga gita foundation-ko on·gija ro·ongrangko gatdoe, uarangni kosako cement ripripe tariaha. Bang·bata tarigimin retaining wall-rangon chu·onga gita cement aro an·chengrangko on·gija tariani gimin, retaining wall-rang bang·e baijawa aro ta·raken be·gropaigen ine NHIDCL-ni kamko jegale, complaint ka·doangaha.

Indake, ADE-ni dilgiparang June 16 tarik, Sombar salo NHIDCL-ni Engineer aro Contractor baksa tom·e chanchirimaniko dakenba, tari namgijagipa retaining wall-rangko name taritaigen ine Engineer aro Contractor, ADE-ni dilgiparangna ku·rachakataha.

Unbaksana, sorokni retaining wall-rangko mangraknate baina gita namgipa an·chengrangko cement baksa brine tarichina, ro·ong jetani ginchirangko cement baksa bringija, retaining wall-rangko taripilchina, ADE, NHIDCL-ko didiangaha. Maina ro·ong jetani ginchiko cement baksa brine, retaining wall-rangko tarigenchimode, baijawa, wachini somoion be·gropaigen ine aganaha. Uni gimin retaining wall-rangko tariengon, name nitoe aro sile tarchina ADE-ni dilgiparang contractor-ko didiangaha.

Minggipin, ADE-ni mingsa nangchongmotgipa dabianiara, Rongkhon jolrango salanti ja·achi re·ruraenggipa bang·a skul aro college chatro chatrirang aro manderangna namen kenchakani ong·enga, ine janaptenba, ja·achi re·ruraenggipa manderangni naljokanina CC foot-path-ko tarichina contractor-ko didiangaha. Maina bang·a gari salgiparango maming ka·dongani dongja skatang saltokengani gimin maiba a·sel ong·na nangode, saniba janggirang gimanaba donga. Maina ja·achi re·gipa manderang garina rama gele watna biap dongja, kosakchi a·dram aro ka·machi a·kuang donga, ua sorokrangko simsakgija gari salanichi maiba, a·sel ong·na nangode, sawa daitoko ra·gen. Uni gimin, “Chingni nangnikanide, CC foot-path-ko tarie on·na nangchongmotenga” ine NHIDCL-ni Engineer aro Contractor-ko didiangaha.

“Skangni gitcham, Detail Project Report (DPR)-ode, CC foot-path tarina on·jachim, indiba chinga na·simangni dabia gita CC foot-path-ko tarie on·gen” ine NHIDCL-ni contractor-ba ku·rachakataha.

Indake, uamangni namgipa ku·rachakaniko on·ahani gimin, “Chinga NHIDCL-ni Engineer aro Contractor-ko mittelna kusi ong·a aro Rongram-oni Chitoktok-ona tarienggipa, NH ramako nambate taripilgen, ine ka·dongataniko on·ataha. Indiba uamangni ku·rachaka gita name rama aro retaining wall-rangko tarijaode, contractor-ni kosako raka ja·kurangko de·anggen” ine ADE-ni dilgiparang parakataha.