Shillong, June 15,2025 Sorah-o donggipa
WeiSawdong parking lot-o Raja Raghuvanshi-ko ka·saninggija so·otani ja·man, uni jikgipa Sonam aro gipin sakgittam manderang changni chang bus aro rel garirangko bodole kilometre 2,227 mang chel·gipa, Madhya Pradesh a·dokni Indore songjinmaona sokangaha. Indake, Sonam Meghalaya-oni joke katangenba, an·tangko rim·srukaha ine tol·e, bichal ka·aoni jokna miksonganiko pulisrang da·o parakaha.
East Khasi Hills a·jani Superintendent of Police Vivek Syiem May 23 tariko Raja-ko so·otani ja·mano obostarangko che·em che·em talate on·aha. Uamang May 23 tarik salni 2 ba 1:18 bajimango Raja-ko so·ote, uni manggisiko chubegipa a·silangchi galonate, Sonam Raghvanshi aro sakgittam manderang
WeiSawdong-oni scooty-rango re·angaha. Re·pilna skang, Raja-ko so·otgipa saksa Akash Rajput-ni an·chiraragipa ba·rako pindapna Sonam an·tangni raincoat-ko on·aha. Uni ja·mano uamang Bri Evi Point-o dongdipaha aro Akash raincoat-ko goe galataha, jekon pulisrang ja·mano man·aha.
“Raincoat-o dak donggipara an·chima maia u·ijachim, indiba ja·mano uko an·chi ine u·ina man·aha aro chinga uko forensic-ona watataha,” ine East Khasi Hills-ni SP Vivek Syiem aganaha.
Evi Point-oni Sonam-ni salgipa scooty-ko Akash salskaaha aro uano Sonam gachapaha. Sonam aro Raja-ni para ra·gipa scooty-ko Anand Kurmi salaha aro uko Sohra Rim-o gale donangaha. Law Mawphlang batbae, Raj Kushwaha-ni on·atgipa burqa-ko Vishal Singh Chauhan-oniko ra·chake, Sonam taxi gadoaha. Burqa-ko gane, Sonam Shillong Pulis Bazaar-ona re·angaha.
Sonam Shillong-oni Guwahati-ona tourist taxi-ko ra·angaha. Indake Guwahati ISBT-oni Siliguri-ona bus-o re·angaha. Siliguri-oni ua bus dingtango Patna-ona re·angaha, Patna-oni Arrah-ona aro uni ja·mano Lucknow-ona rel gario re·angaha. Indake ua Lucknow-oni Indore-ona bus-o re·ange, May 26 tariko sokeaha. May 26-oni June 8 tarikona ua Indore-o dongnue chakaha.
Sonam-ni kate chakani ramarangko pilakkon Raj Kushwaha che·em che·em chanchie tarisoaha. Indore-o ong·engmitingo, June 8 tariko Raj, Sonam-ko Siliguri-ona re·angchina ge·etaha. Uamangni miksongani gitade, Sonam-ko Siliguri-o manderangna mikkang pa·e, an·tangko rim·srukaha ine aganna chanchiachim.
“Chel·begipa biapo ong·ani gimin darangba Raja-ni manggisiko man·jawaha ine chanchiachim. Iani bidingo mokordoma ka·na jasa ba jagnirang nanggen, unode manggisi sognok aro chinga u·ijawa ine ua an·tangko rim·sruka ine togina am·achim” ine Syiem aganaha.
Indiba, June 6 tariko, Sohra-ni Mawlakhiat minggipa biapni tourist guide, Albet Pde, May 23 tariko, Raja-ni siani salo Sonam aro Raja-ko me·asa sakgittam baksa nikaha ine kobor ra·timgiparangna aganaha. Ia kobor Raj-ona sokangaha aro ua an·tangtangko parakgnok ine kene, Sonam-ko Indore-oni Siliguri-ona re·ange an·tangko rim·sruka ine aganchina ge·etaha.
Uamangni indake budi dakaniko Meghalaya Pulis u·isoe uamangko sandina Madhya Pradesh aro Uttar Pradesh-ona re·angaha.
Indake, June 8 tariko Sonam-ni Siliguri-ona re·angna dakengmiting somoio, Meghalaya Pulis Akash Rajput-ko Uttar Pradeash-oniko rim·aha. Raj Kushwaha iani gimin kobor man·aha, indiba uko pulis-an rim·ama saobasa rim·ama u·ijaha. Sonam Raj-ni tik ka·atgipa gari-o Siliguri-ona re·angengachim, unomiting Raj Kushwaha kenjagoke, Sonam-na phone ka·ataha aro an·tangko rim·srukaoni joka ine aganchina ge·etaha.
Uandake, Sonam-ni Raja-ko so·otani sal 17 ja·mano, a·sel ong·gipa biaponi kilometre 1100 mang chel·ao donggipa Uttar Pradesh-ni Ghazipur-oniko rim·aha.
Sonam-ni kate chakna chanchisoanirang chu·sokjaha aro uko Shillong-ona rimbaaha, unbaksana dos dakgipa sakbri manderangko da·o pulisrangni ning·o sal 8-na donenga. Raja-ko so·otgipa sakbonga Sonam, Raj Kushwaha, Vishal Singh Chauhan, Akash Rajput aro Anang Kurmi-ko sing·sandianirangko dakenga, ine SP parakataha.
