Shillong, June 8, 2025: Madhya Pradesh Indore-oni songrebagipa tourist jiksesani Sohra-o gimaani ja·mano segipa Raja Raghuvanshi-ni manggisiko June 2 tariko man·aha. Uko post mortem ka·ani ja·man, saobasa so·otaha ine ma·sina man·aha.

Uni gisepon uni jikgipa Sonam-kode da·alonaba man·kujaengani gimin, maidakemamcha a·sel ong·aha, chong·motko ma·sina gita man·chipkujaengani gimin gimagipa nokdangni manderang a·dokni manderangko matnangataha. Uni gisepon badiaba media-rang a·dokon songre songbatgipa manderangna kenchakani gnang ine janapatenba, Raja Raghuvanshi aro Sonam-ni kosako dos dakgipa manderangko sorkari sasti on·gija watjawa ine Tourism Minister, Paul Lyngdoh Sonibar salo aganaha.

A·doko a·sel ong·ani gisepo iara dingtangtegipa ong·a ine aganenba, skangonin Sohra-o tourist-rangko chadrapa dongkuja, uamang tourist-rangko namen jakkala, maina ia a·joan Meghalaya-ni tourism industry-ni mongsonggipa biap ong·a, ine Lyngdoh aganaha.

“Sohra-o darang tourist-koba doka sata dongkuja” ine janapatengon, Indore-ni tourist jiksesa indakgipa obostarangko chagrongani ja·mano, Sohra-ona darangba re·angtokjawaha ine chanchiachim, indiba da·oba hajal hajal tourist-rang Sohra-ona re·batokenga, ine Tourism Minister aganaha.

“Sohra-ni manderang tourist-rangchin janggi tangengode, uamang maikai an·tangtangni janggi tangani cholrangko cha·sotgen” ine aganenba, a·selrangko matchote sandina gita Special Investigation Team-na cholko on·na nanga ineba ua agandapaha.

Iani a·selrangko CBI-chi sandichina, nokdangni manderang dabiengani gimin sing·on, gadang gadang dakesa ja·ku de·na nanggen, da·omitingde Special Investigation Team-an uamangni kamko ka·enga. CBI-chi sandiatna nangkujaenga, SIT-ni kam ka·a chu·sokjaosa gipin ja·kuko de·gen, dos dakgipani kosako chinga mamingkoba dongnujawa ine Lyngdoh aganchakaha.

Uandake, Sohra-o ong·nanggija obosta ong·aniko CBI-chi sandichina, Madhya Pradesh-ni Skotong Minister Mohan Yadav, Union Home Minister Amit Shah-ko didiaha.

Madhya Pradesh-ni Skotong Minister Mohan Yadav-ni tweet ka·atgipao janapatani gitade, Madhya Pradesh pulisni dal·batgipa official-rang, Meghalaya pulisni official-rang baksa agangrikatenga. Tourist jiksesani a·sel ong·ani bidingo Maddhya Pradresh-ni Skotong Minister, Meghalaya Skotong Minister, Conrad Sangma baksa golpogrikengon, da·o gimaenggipa Sonam Raghuvanshi-ko sandiani bidingo rake kam ka·na gita Meghalaya Skotong Minister ku·chakataha, ine Yadav, tweet ka·aha.

Sohra-o gimagipa tourist jiksesaoni segipa Raja Raghuvanshi-ni manggisiko June 2 tariko man·pilaha, indiba jikgipa Sonam-ko da·o dipet man·kujaenga, ine Lyngdoh parakataha.