Bajengoba, June 5,2025: North Garo Hills a·jani Bajengdoba jolo donggipa Upper Nengsa Wakso Govt. LP skulo, skigipa saksaan Nursery-oni Class V-ona gimik sak 62 chatro chatrirangko skina nangani gimin, neng·nikanirangko man·enga ine A·chik Holistic Awakening Movement (AHAM) Bajengdoba Regional Unit parakatenba, ia skulko nirokatchina a·dokni Education Minister Rakkam A Sangma-na sedoataha.

AHAM Bajengdoba Regional Unit-ni parakatani gitade, ia skulo skigipasan chu·ongjaenga ong·ja, indiba skul nokni obostarang namsrangjahani a·sel poraienggipa chatro chatrirang aro skigipaba neng·nikanirangko man·tokenga.

“Ia skulo Nursery-oni Class V-ona poraienggipa chatro chatrirang sak 62 donga aro ia chatro chatrirangko skigipa saksan skie on·aniara chanchisokna ampilgijani ong·a. Una agreba ia skulo asongchakani aro sechakanirang chu·onga gita dongjani a·sel chatro chatrirang, a·arangosa asonge sena nangenga,” ine AHAM Bajengdoba Regional Unit parakataha.

AHAM Bajengdoba Unit-ni parakatani gitade, ia skulo ringani chirangba dongja aro paikanarang dongjani a·sel neng·nikanirangko man·enga.

“Skul nokni obosta namsrangjaha aro nokkingrang selani a·selan, wachini somoirangode class-rangko ra·na man·jaenga,” ine AHAM Bajengdoba Regional Unit parakatenba, ia skul nokko ta·raken tarie on·china, skulna nangchongmotgiparangko chu·onga gita on·china aro skigiparangko rakkidapchina a·dokni Education Minister-ko didiataha.