Resubelpara, May 4,2025: North Garo Hills a·jani Resubelpara Chidaret-o rikenggipa palang ge 100 chakgipa Civil Hospital-ko Opposition dolni dilgipa aro a·dokni gitcham Skotong Minister Dr. Mukul M. Sangma nieaha.
Chidaret-o rikenggipa palang ge 100 chakgipa Civil Hospital-ko 2019-2020 bilsirango a·bachengataha aro ia hospital-ko rikna tangka gong kror 50-ko chamaha.

Ia hospital-ko rikanirang 90% percent matchotengaha aro ia hospital-ko re·baenggipa July jaonin kulina gita Medical Official-rang miksongenga. Indake
ia palang ge 100 chakgipa hospital-ko nina re·angani somoio kamrang matchotangengahani gimin, Opposition dolni dilgipa Dr. Mukul Sangma, North Garo Hills a·jani Health Official-rangko aro hospital-ko rikenggipa contractor-rangko mittele aganangaha.

Ia palang ge 100 chakgipa hospital-ara North Garo Hills a·jani manderangnasan ong·aigija, Garo Hills-ni dingtang dingtang biaprango sondongenggipa manderangnaba bang·en namgni ong·gnok, ineba Dr. Sangma aganaha.

Da·o Tura Medical College-koba rika matchotangengaha, apsan dake Tura Medical College aro Hospital gitan ia palang ge 100 chakgipa hospital-ba mikkangchi ge·gipin Medical College-ko kulina a·bachengonin jumang niksoani donga, ineba Opposition dolni dilgipa agandapangaha.

Ia Resubelpara Chidaret Civil Hospital-ko rikna gita acre 100 a·arangko am·on, A·king Nokmarang aro songni manderang kusi ong·e on·aha. Uni gimin a·dok sorkariba manderangni namgniko dakna nanga. Ian manderangna nangchongmotgipa hospital ong·a aro sorkari hospital-o koros nanggijan sanna bananirangko ra·na man·gen. Indiba Private company-rangchi chalaiode, sanna bananio koros bang·e nanggen, uni gimin sorkari Civil hospital aro medical College-ko sorkarian jako ra·e chalaina nanga, Dr Sangma aganangaha.