Shillong, Jun 4, 2025: June 2 tariko Sohra jolo donggipa Weisawdong chidare sambaoniko sogimin manggisiko man·ani ja·man, Raja Raghuvanshi-ko saobarang so·ote, galangaha ine East Khasi Hills a·jani Superintendent of Pulis (SP) Vivek Syiem, Monggolbar salo parakataha.
SP-ni parakatani gitade, ua mandeko so·otana jakkalgipa atte aro mobile phone-ko pulisrang man·aha.
Pulisangni man·gipa atteara internet gita bregipa ong·na nanga ine chanchichipenga ine SP aganaha.
Ia mandeko so·otaniara chanchisamsoe daka gita nikenga aro ia mandeko maiba miksonganio so·otahakon ineba ua aganaha.
Da·o dipet ia mandeko a·silangchi galonatna skang so·otama, ma galonatchengani ja·mansa attechi so·otama, name ma·sikujaenga ine janapatenba, post mortem report-ko man·ahaosa, iani bidingo ma·sina man·aignok ine SP aganaha.
Ia a·selni bidingo kakketko ma·sina gita pulisrang, gisiko nangbee am·sandianiko dakenga aro ning·tubate am·sandina gita SIT-ko songaha, ineba Syiem aganaha.
Ia mande baksa gimagipa uni jikgipa Sonam Raghuvanshi-koba pulisrang, SDRF aro NDRF-ni sipairang baksa Mongolbar salo,
Weisawdong a·silangrangoniko sandiaha, indiba da·o dipet uko man·kujaenga, ine SP parakataha.
