Williamnagar, June 3, 2025: East Garo Hills a·jani District Transport Officer (DTO) kamtangko ka·na gisiko nangjaengani ine matnangenba, Garo Students’ Union (GSU) Eastern Zone Williamnagar-ni DTO gipin biapchi kam ra·jitangchina dabiangaha.

“Ia DTO-ni bewalrang namja ine manderang changni chang badi ka·anirangko man·soani gimin ia officer-ko dingtang biapona kam ra·jitangchina chinga dabienga,” ine GSU Eastern Zone, Williamnagar-ni President Goera R.Sangma parakataha.

GSU Eastern Zone-ni parakatani gitade, East Garo Hills a·jani DTO kamtangchi re·anggija, bang·bata somoirangon, an·tangni official quarter-osa dongaia aro office-ni somoioba kamtangchi re·angna gisiko nangjachim.

“Ua office-ona re·bae kamrangko ka·ani pal
bang·bata somoirangon, an·tangni quarter-onisa nangchongmotgipa lekkarangko soi ka·atrongaia. Uni indake office-ona re·barongjani a·sel manderang, uni quarter-ona re·ange an·tangtangni lekkarango soirangko ra·na nangenga. Ia officer-ko basakoba chu peke dongakosa nikrongaia, ine matnanganirangko knasoronga. Una agreba ia officer, manderangko ka·saninggija dake mesokronga aro kragija kattarangchi aganronga, ine chingna badi ka·anirangko man·soaha,” ine GSU Eastern Zone parakataha.

GSU Williamnagar-ni President-ni parakatani gitade, re·anggipa May 30 tariko, GSU-ni member-rang, an·tangtangni driving licence-o soi ra·na DTO-ni quarter-ona re·angon, uamangkoba, mande ra·gija manengesa watataha.

Ua officer-ni namgijagipa bewalara ra·chakna man·gijani ong·a aro uandakgipa officer-ko GSU nie dongjawa, ua saksa officer ong·e, East Garo Hills a·jani manderangna gisiko nange kam ka·e on·na nanga aro mandeskako mande ra·na nanga.

Uni gimin, “Chingna uandakgipa DTO-ko nangja, kakketgipa officer-kosa nanga, da·o ong·enggipa DTO-ko ta·raken gipin biapchi ra·jitangchina, chinga sorkariko didiatenga. Uni palo namgipa aro manderangna simsakgipa officer-ko rimbasksachina chinga dabienga” ine GSU Eastern Zone, parakataha.

“Chinga ia officer-ni kosako jegale, Poster Campaign-ko a·bachengataha. Uni gisepon chingni dabianiko bil gnanggipa authority-rang knachakja ong·ode, GSU rakbata ja·kurangko de·e, jingjengataniko a·bachengatgen aro DTO office-ko picketing ka·angagen” ineba GSU Eastern Zone, parakataha.