Shillong, Jun 2, 2025: Re·anggipa May 22 tarikoni gimaenggipa tourist jiksesa sakgnioni Raja Raghuvanshi-ni sogimin manggisiko Sombar pringo sipairang Sohra joloniko man·aha.
Indiba uni jikgipako man·kujaenga aro dingtang dingtang biaprangoniko sandiengkua, ine pulis official-rang parakataha.

Ua sogimin manggisiko Sombar pringni 11:15 bajimango, Weisadong chidare sambao donggipa a·silangoniko man·aha aro ua manggisiko man·ani ja·man, official-rang, ua manggisiara sal 10-na skang, Indore-oni re·bae Sohra jolo gimaenggipa tourist saksani manggisi ong·a ine ma·sina man·aha.

Ua manggisiko niechina pulisrang, gimaenggipa tourist sakgnini ma·drangrangko okamataha aro ian Raja Raghuvanshi-ni manggisi ong·a ine ma·drangrang parakaha.

Pulis official-rangni u·iatani gitade, ia manggisiko drone-rangchi sandienba, a·silangoniko man·aha.

Ua tourist sakgni, re·anggipa May 22 tariko, Shillong-oniko scooty para ra·e, Nongriat songo donggipa ‘Double Decker Root Bridge’-ona re·baenba, Mawkakhiat songona sokbaaha. Indake, Nongriat songona re·dilchina uamang songni mande saksa, Bha Wansai-ko rimangaha aro Nongriat songo uamang Shipara Homestay-o waltuaha, ine official-rang parakataha.

Uamang May-ni 23 tarik pringni 6 bajimango homestay-oni Mawlakhiat-ona re·angaha. Uamangko Nongriat-oni Mawlakhiat-ona re·angpilako, Mawlakhiat parking lot-o uamangni scooty-ko man·aha ingipani giminde, pulisrangna maming u·iata dongja ine pulis official-rang aganaha.

May 24 tarik walni 9 bajimangosa, Sohrarim-ni Sordar, gale donanggipa scooty-ko man·aha ine koborko on·ataha aro ua manderang gimaaha ine uamangni ma·drang badi (FIR) ka·aha ine Sohra-ni ADC parakataha.

Una skang, May 22 tariko uamang jiksesa, Saitsohpen-o donggipa Manha Homestay-oba napangaha, indiba uano biap dongjani gimin aro mikkarang jimbee waengani gimin, an·tangtangni bosturang baksana an·tangtangni biming aro phone nomber-ko on·e, uamang gipin biapko sandina re·angaha. Uamang ja·manosa Nongriat-ona re·angaha ine official-rang aganaha.

Da·o segipani manggisiko man·ahani gimin, pulisrang uni jikgipa Sonam Raghuvanshi-koba bilaken sandienga ine official-rang parakataha.