Resubelpara, June 2, 2025: North Garo Hills a·jani Resubelpara Civil Sub-Division-ko 2012 bilsion chu·gimik North Garo Hills District songahaoba, da·alonan pulisrangni bilrang Sub-Division-ni somoio jedake ong·a, apsan ong·kuengani gimin pilak kamrangon, neng·nikanirangko chagrongna nangkuenga ine A·chik State Peoples’ Front (ASPF) parakatenba, North Garo Hills a·jao pulis dolrangko aro chel·chakgipa sipairangko bilakdapatchina a·dok sorkariko didiataha.

Iani bidingo a·dokni Home Minister Prestone Tynsong-na sedoatengon, North Garo Hills District-ko 2012 bilsion songaha indioba, da·alonan pulisrangko, nangani kri baridapatkujaengani a·sel kamrangon, neng·nikanirangko man·kuenga ine ASPF-ni General Secretary Bernita R. Marak parakataha.

“Kobor man·soani gitade, North Garo Hills-ko District man·chengaonin, Superintendent of Pulis (SP) aro Additional SP-ni kamrangna agrede, gipin kamrangko aro sipairangko on·dapa dongkujaenga aro Sub-Division-ni somoio gitan apsan ong·kuenga. District ong·ani kri pilak kamrangko ka·anirang District level-ona tang·dodapna nangenga. Uni gimin North Garo Hills a·jao pulisrangko aro pulisrangni bilko baridapatna nanga aro niam retirangko rakkianio (law and order) manderangna chel·chakaniko on·anio bilakdapatna nangenga”, ine ASPF-ni General Secretary parakataha.

North Garo Hills a·jana da·o on·enggipa pulis, dolrang, dingtang dingtang kamrang, jedake, manderangko chel·chakani, ong·gija dakgipa kamrangko warachakani aro manderang baksa ku·mong nangrimgrikanio kamrangko ka·anrango chu·ongjaenga ine janapatenba, da·ororo sal somoirango, North Garo Hills a·jao manderangni jelbra jelsuaniko nigrike, sipai dolrangko baridapatna nangchongmotengaha ineba Marak parakataha.

“Uni gimin North Garo Hills a·jao pulisrangko nangani kri rakkidapchina, chinga a·dok sorkariko, mongsongbate a·dokni Skotong Minister aro Home Minister-ko mande ra·bean baksa mol·molatenga. Mongsongbate, North Garo Hills a·jao donggipa pilak Pulis Station-rango, Outpost-rango, OGC-rango aro pilak Anti-Dacoity (AD) Camp-rango sipairangko ba chel·chakgipa sipai dolrangko bariatchina didiatnga. Iandake pulisrangko baridapatanichi manderangna chel·chakaniko aro ong·gija dakanirangko nambate nirok sandina man·gen” ine ASPF-ni General Gecretary parakataha.