Tura, June 2, 2025: Tura Medical College aro Hospital-ko Public Private Partnership (PPP) mode-o chalaina a·dok sorkarini tender on·aniara, 2014 bilsio ANVC aro ANVC-B dolni a·dok aro ma·mong sorkari baksa songgigrikanio soi ka·grikaniko pe·ani ong·a ine Tura-ni MDC aro ANVC-B-ni gitcham Chairman Bernard N Marak parakataha.

Batanggipa 2014 bilsio ANVC aro ANVC-B dolni sorkari baksa songgigrikani gitade, ia hospital Garo Hills Autonomous District Council (GHADC)-ni ning·osa ong·na nanga, a·dok sorkarini ning·o ong·na nangja, ine Tura-ni MDC jegalataha.

“Ia Tura Medical College aro Hospital-ara 2014 bilsio ANVC aro ANVC-B-ni ma·mong aro a·dok sorkarini gisepo songgigrikani bitesa ong·a. Iako songgrikanio Para 5.1-o rongtalen, janapani gnang. Ian Tura Medical College, General Nursing & Midwifery Skul, Para Medical Institute aro Tura-o Women aro Childrens’ Hospital-ko man·chape Garo Hills-o sanna bananirangko skie ra·aniko namdapatani ong·a,” ine Marak parakataha.

Tura Medical College aro Hospital-ko chalaianio jak on·pagija, GHADC-ni ning·o chalaina gita on·china Tura-ni MDC, a·dok sorkariko didiataha.

ANVC aro ANVC-B dolni songgigrikaniko chu·sokatna gita, State Level Monitoring Committee-ko songjahani gimin Marak, a·dok sorkariko matnangatenba, uamangni kosako UAPA-ni ning·o case ka·e rona jotton ka·aha ineba ua matnangataha.

Tura Medical College aro Hospital-ko PPP mode-o chalaina, a·dok sorkarini tender on·aniara, ANVC aro ANVC-B dolni sorkari baksa songgigrikaniko pe·ani ong·a, ine matnangatenba, ia Tura Medical College aro Hospital-na tender on·aniko dontongpilchina Tura MDC aro ANVC-B-ni gitcham Chairman, a·dok sorkariko didiataha.