Madhya Pradesh, May 26,2025: Khandwa District-ni Khalwa Pulis Station-ni ning·o, bilsi 45 ong·gipa aro bi·sa sakgnini ma·gipako manderang jinma kragija til·ekdraani ja·mano doke-sate aro kal·ake siataha. Sonibar pringo ua me·chikma bia ka·gipaona re·angengachim, indiba ja·mano uni saknabee, noksulni noko siboke dongako man·aha. Ua be·enni ning·o bilongbee saknaako man·aha aro an·chirang tipjahani a·sel pulisrang sokangna skangan siaha.

Pulisni koborna parakani gitade, ua a·sel Sonibar salni 1 bajimango, Khalwa Tribal Zone-ni ning·o donggipa Roshni Chowki minggipa biapo ong·aha. Ua tribal me·chikma ong·achim aro uni private part-rangko ka·saninggija kal·ake, go·ol aro iron rode-chi su·broke roani a·sel ua me·chikma siaiaha.

Pulisrang ua mamlani bidingo sakgni manderangko chanchichipe rim·aha aro ua manderangara Sunil Dhurve aro Hari Palvi ong·achim. Uamang sakgnian ua me·chikmako namemanchaan ma·siachim. Uamang mainaba miksongmanchaesa ua me·chikmako so·otaha, ine am·sandigiparang ma·siaha, indaken uamang sakgnio sing·sandianiko dakenga.

Robibar salo ua me·chikmani manggisiko Medical College-ni Forensic Expert-rangni dilachi, Khandwa District Hospital-o post mortem ka·na ra·angaha. Post mortem report-o a·sel chong·motko man·na ka·dongeng aro uano pangchake sandianianirangko dakanggen, ine pulisrang parakaha.

BJP Spokeperson Shivam Shukla ua namgijagipa a·selni gimin aganengon, “Iandake namgijagipa aro ka·saninggijagipa manderangna Madhya Pradesh-o biap dongja. Sorkari batanggipa somoirangonin, til·ekdragipa aro mande so·otgiparangko sasti on·na raken ja·ku de·enga. Da·o dos dakgiparangko rim·aha aro post mortem report-na sengkuenga, mikkangchi ia mamlani bidingo maidakgipa ja·kuko de·anggen iade sorkarini jakosa ong·aignok” ine BJP dilgipa aganaha.

Pulisrang niam gita kam ka·na skangba post mortem report-na sengkuenga ine parakaha.