Tura, April 20,2025:: Ia 2025 bilsini Secondary School Leaving Certificate (SSLC) Supplementary porikkako re·baenggipa May 1 tarikoni May 8 tarikona ong·atenga ine Meghalaya Board of School Education (MBOSE)-ni Director Accreditation aro Controller of Examinations TR Laloo parakataha.
Laloo-ni u·iatani gitade, je chatro chatrirangan ia bilsini SSLC porikkao chu·sokna man·jahachim, ua chatro chatrirang Supplementary porikkako sepiltaina man·gen ine parakataha.
Ia Supplementary porikkani skanggipa salo, chong·motan May 1 tariko Mathematics/Special Mathematics ong·gen, May 2 tariko Science & Technology, May 5 tariko Health & Physical Education/Computer Science/Vocational Subject, May 6 tariko English, May 7 tariko Modern Indian Languages/Additional English aro May 8 tariko Social Science ong·gen.
Official-ni u·iatani gitade, porikka sechakram nokdringko ba hall-ko pring 9:30 bajio kuligen, question paper-rangko pring 9:45 bajio sualgen, Answer script-rangko pring 9:50 bajio sualgen. Uni gimin chatro chatrirang pring 10 bajioni porikkako sechakatgen ine parakataha.
