Tura, April 10,2025: South Garo Hills a·jani Rongara C&RD Block ning·o donggipa Seelpang Government LP Skul nok namsrangjahani a·sel skulo poraienggipa bi·sarang aro kam ka·enggiparang namen neng·nikanirangko chagrongenga ine A·chik State People’s Front (ASPF) parakatenba, ua skul nokko ta·raken taridape on·china a·dokni Education Minister Rakkam A Sangma-na sedoataha.

ASPF, HQ-ni Chief Organizing Secretary Raksim Marak-ni parakatani gitade, ua skulara a·dokni Education Minister aro Rongara-Siju constituency-ni MLA Rakkam A Sangma-ni a·jaon ong·achim aro ua skul nokko 1998 bilsioni a·bachengataha aro changsaba taridape on·a dongkujaachim.

Ua skul noko nokkingrang dongjaha aro do·ga kelkirangba be·tokaha, indiba da·alonan ua skul noko bi·sarangna skie on·aniara namen dukni katta ong·a, ine ASPF-ni Chief Organizing Secretary parakataha.

Songo donggipa bi·sarangna lekka porako skie on·na gita skul nokrang namgipa ong·na nangchongmota, indiba ua skul nokni nokkingrang aro kelkirang nosto ong·tokaha, mikkarang waahaode skul ka·na man·gija neng·nikanirangko man·enga aro ding·kario sal rakani a·sel bi·sarang skie ra·na man·jaenga ine Marak parakataha.

Ua skul nok obosta namsrangjahani gimin skulni skigipa saksa, skulni nangchongmotgipa bosturangko naljoke rakkina gita an·tangni koroschi bostu donchakgipa kuturiko tarie tin pinaha ineba ASPF-ni Chief Organizing Secretary parakataha.

Uni gimin ua skulo nangenggipa neng·nikanirangko chel·chakna ta·raken dakchakanirangko on·china Education Minister-na sedoatgipa chittio ASPF-ni Chief Oganizing Secretary janapataha.