Shillong, April 2, 2025: Dalmia Bharat Ltd-ni CSR Branch, Dalmia Bharat Foundation (DBF), Meghalaya, Lumhshnong-ni Thangskai-o 2-gipa DIKSHa Centre-ko kulie on·angaha. Ia Center-o bilsiantian, Assistant Electrician Course-rangko sak 120 chatro chatrirangna skie on·aniko dakenga.
DBF, chadamberangna karkanarango kam ka·na changa sapanirangko skie on·an baksana kamrangko sandie on·na gita dakchaka. Re·anggipa January jao DBF-ni skanggipa DIKSHa Centre-ko Meghalaya-ni Khliehriat-o donggipa Jaintia Eastern College-o kulie on·chengaha.
DBF-ni CEO, Ashok Kumar Gupta, ia gitalgipa Centre-ko kulie on·aniara, chadamberangni mikkangchi janggi tangani cholko tarie on·an baksana songni manderang, sorkarini dakchakaniko man·e jakgitel ong·e an·tangari dake rim·e ba ga·chate janggi tangna man·gipa ong·atna dakchakaniko on·na on·kange kam ka·aniko mesoka ine aganangaha.
Thangskai Centre-an, India a·songni Salgro Salaram a·dokrango donggipa DIKSHa Centre-rangoni 5-gipa ong·enga. Da·o dipet, DBF, jolni sak 1,440 batpile chadamberangna skie on·anirangko dakenga, jeon skie ra·gimin sak 1083 chadamberang kamrangko man·angtokaha. DBF, bang·a DIKSHa Centre-rangko kulienba, chadamberangna dingtang dingtang training-rangko on·e, kam man·ani aro tangka paisa man·aniko tang·doatna miksongenga.
