Tura, March 28, 2025: Garo Hills Autonomous District Council (GHADC)-ni chang 13-gipa Session-ko March 26 tariko a·bachengatani salo GHADC-ni warachakenggipa, TMC MDC-rang Cherak W.Momin, Alphonsus R.Marak aro Rinaldo K.Sangma, Winter Capital-ni bidingo chanchirimna gita Resolution-ko ra·bae, GHADC-ni Chairman Sengchim N.Sangma-na on·aha aro Chairman ua Resolution-ko ra·chakaha.
Warachakenggipa MDC-angni ra·bagipa, resolution-ara batanggipa 1952 bilsini April 14 tariko Garo Hills Autonomous District Council-ko a·bachengataoni bang·a bilsirangna GHADC-ko chalaianggipa, Executive Committee (EC)-rang A·chik a·songna bang·a namdapatanirangko ra·bana miksonge, niamrangko tariaha, jedakode sorkari manderangna sepangbate kamrangko ka·e on·anian mongsongbatgipa ong·a.
Garo Hills-o damb bonga district-rang gnang, jean songdongenggipa pilak manderangni nangnikaniara Tura-ko Winter ba Second Capital dakanian ong·a. Jechin A·chik a·songni namroro silroroaniko ra·bana man·gen, ine ka·dongani gnang aro jenan ru·uta bilsirangonin ia miksonganiko chu·sokatna kam ka·anirang aro dabianirangko dakenga.
Iani bidingo A·chik a·songni pal ku·rang on·enggipa Garo Hills-ni dingtang dingtang dolrang, Tura-ko Meghalaya-ni Second Winter Capital songe on·china dabiani ong·achim.
Uni gimin, da·o ong·enggipa GHADC-ni chang chi·gittamgipa tom·anio Tura-ko Meghalaya-ni Second Winter Capital dakna miksonganio Meghalaya sorkariko iani bidingo maikai ta·rake chu·sokatna man·gen, cholrangko sandie kamrangko ka·e on·china jinma ku·cholsan dabina, warachakenggipa MDC-rang ia Resolution-ko ra·baha ine Kharkutta-ni MDC Cherak Momin aganaha.
“Chingni ra·bagipa Resolution-ko Chairman ra·chakaha aro iani bidingo Session-ni bon·kamgipa salo ruling aro opposition dolni MDC-rang, A·chik a·song aro jatni namgnina chanchirimgen. Chinga ka·donga, ruling dolni MDC-rangba ia resolution-ni bidingo apsan sko dondime chanchirimna ku·mongrimpagen” ine Momin aganaha.
Indake Session-ni gnigipa salo GHADC-ni CEM Albinush R.Marak, Delimitation-ni bidingo Official Motion-ko ra·baha. Maina ru·uta bilsirangna taridapgija donenggipa GHADC-ni dam 29 constituency-rangko nipiltaina gita ruling aro opposition dolni MDC-rang namnike ra·chakaha. Ia GHADC-ni constituency-rangko nipiltaie kam ka·na gita Committee ge·sako songna jinma namnike ra·chakaha. Man·adipet ta·raken delimitation-ko tarina Committee ge·sako songgen ine GHADC-ni CEM, Session-o parakataha.
Ia nambegipa kamna ja·ku de·dilenggipa CEM-ko opposition dolni MDC-rang mittelpilangskaha.
