Baghmara:, Mar 10,2025: South Garo Hills-ni MLA-rang re·anggipa adita salrangna skang Baghmara-oni Bangladesh a·songni Dacca songjinmaona Rel ramako tarichina mol·mole, a·dokni Skotong Minister-na lekka sedoataniko A·chik Holistic Awakening Movement (AHAM) Southern Zone,Baghmara jegalatenba, niamgri napsrukbaaniko bariatgen ine kenchaksoaniko parakataha.

AHAM Southern Zone-ni Skotong Minister Conrad K Sangma-na sedoatgipa chittio janapatenba, mikkangchi rel ramako Baghmara-ona taribaa ong·ode, gipin a·songrangoni niamgri napsrukbaaniko bariatgen ine parakataha.

South Garo Hills-ona rel ramako ra·bana miksonganiko jegalja, indiba maming chel·chaksoani gri indaka somoio Rel ramako ra·baa ong·ode, South Garo Hills-o songdonggipa manderangna namen kenbeani ong·chongmotgen ine AHAM janapataha.

“Mongsongbate kenchakanide niamgri napsrukbagiparangni gimin ong·a. Meghalaya-o niamgri napsrukbaaniko champengsona regulatory mechanism ba maming bilakgipa niam dongja. Uni a·sel niamgri napsrukanirangko Garo Hills-ni dingtang dingtang bakrango nikna man·enga. Gipin biaprangoni re·bae bading chiwalgiparang,niamgri songdonggiparang batrikrikaniko nikengon Garo Hills-ni manderang bang·a neng·nikanirangko chagrongna nangenga” ineba AHAM Southern Zone, janapataha.

Niamgri napsrukanirangko champengsona maming niamko ra·gatchenggija, Baghmara-ona rel ramako ra·baa ong·ode, Garo Hills-ni obostarang namjabatsranggen.
“Rel ramako taria ong·ode, niamgri napsrukgiparangna altubatgipa chol ong·gen aro South Garo Hills-ni Demographic Structure-ko namen dingatangatgnok. Niamgri napsrukna altugipa sima ari aro rakgipa niamrang dongjani a·sel Baghmara-ni manderangna aro uamangni a·arang, gam-jinrangna bilongen kenchakani donga” ine ine AHAM Southern Zone-ni General Secretary parakataha.

Rel rama project-ko ra·baani pal sorkari, NH 217 ramako namdapata on·ode nambatgenchim. Batanggimin bilsi 53 mangna nikchange donenga. “Infrastructure development, jekai nambata rama, dollong aro manderangni jakkalna nanggipa, sanna bananirang, skie ra·ram skul aro kolej-rang public utility, healthcare facility, educational aro chadamberangna kamrangko bikote on·na nam·ode sorkarini namgipa kam ong·genchim” ine AHAM Southern Zone, janapataha.