Shillong, Feb 25, 2025: Voice of the People Party (VPP), Khasi Hills Autonomous District Council (KHADC) election-o dam 17 seat-rangko chegope gital Executive Committee (EC)-ko rikna a·kangengon, sak 17 MDC-rangoni sako gital Chief Executive Membor (CEM) songgen, da·o dipet Voice of VPP chanchikujaenga.
Iani bidingo sing·anina aganchakengon, “Da·o dipet iani bidingo VPP-ni dilgiparang chanchia dongkujaenga, indiba jensalo gital CEM-ko songani bidingo chanchigen, jinmana u·iatgen,” ine VPP-ni president Ardent Miller Basaiawmoit parakataha.
Gital MDC-rangni ku·mikchetani aro Chairman-ko seokani ja·mansa CEM-ko songani gimin chanchigen ineba Ardent Basaiawmoit parakataha.
KHADC-o EC-ko rikna gita VPP-o chu·onga gitan member-rang dongahani gimin, VPP gital EC-ko rikna a·kangenba, gipin dolni MDC-rangko nangjawa ineba VPP-ni President parakataha.
KHADC election-o VPP-ni chu·sokani bidingo janapatengon, ian VPP-ni miksonganirangko manderangni ra·chakahani giminsa ong·aha ine Basaiawmoit aganaha.
JHADC election-o bil jak aro tangka paisarangko jakkalanirang dongjagenchimode, VPP-an chegopna gita man·genchim, ineba VPP-ni President parakataha.
Basaiawmoit-ni parakatani gitade, Jaintia Hills-o bil jak mesoke aro tangka paisa jakkalanirangko District Official-rang champengna man·jani a·selsa, VPP dam 8 seat-rangkosa chena gita man·aiaha.
