Tura, Aug 26,2024: Re·anggipa 2023 bilsini General Assembly Election-o Gambegre constituency-o Garo National Council (GNC)-ni candidate ong·e, susagipa Pa Sairill D Marak, an·tangni GNC party-o Executive Member aro Membership ong·aniko August 26 tarik Sombar salo wataha ba resigned ka·aha.
Sairill Marak an·tangni kam watani chittiko ba Resignation letter-ko GNC-ni President-na on·ataha ine koborna parakataha.
Ua saksa sorkarini kamko wate a·song aro jatna dangdike on·na aro jatko warachakna an·tangko on·kange, manderangna dangdik sachie on·na miksonge GNC party-o napahachim. “Anga angni atchiram songko gimikni gitan galchipe donako nike, angni gisiko suk ong·jae, anga service ka·e dongaiode ong·jawa, ine 2023 bilsini Assembly Election-o susaaha. Anga GNC party-ko A·chik jatni party ong·a ine nikenba, ia party-ko bilakatna angni kamba ong·a ine anga GNC party ticket-ko ra·e, susaaha. Indiba, anga GNC candidate ong·e susagenchimoba, GNC-ni dilgiparang angna maming dakchakaniko on·jaha. Anga Independent candidate gita susana ga·akaha” ine Marak suk ong·gijaniko parakataha.
Batanggipa bilsirango GNC party Chokpot constituency-o mangmangsan bilakaia. Indiba GNC party Gambegre constituency-kode nichanggalahani gimin, Marak suk ong·jae, an·tangni Resignation Letter-ko GNC President-na on·aha ineba parakataha.
Marak a·song aro jatna dangdike on·na saksan mangmangde bilake kam ka·na man·jawa, uni gimin, “Anga dilgipa ong·genchimoba, angni kosako re·dilgipa ba dilgipako nanga ine angni manderang baksa ku·monge, Dr. Mukul Sangma-ni dilenggipa TMC party baksa anga bakrime mikkangchi kamrangko ka·anggen” ine Sairill Marak parakataha.
