Williamnagar, May 30, 2025: East Garo Hills a·jani Williamnagar town-o donggipa Rongpi dollong aro Rongbinggre dollongko ta·rake kam matchotate on·china contractor-na mikkrakataniko on·china, Garo Hills Youth Solidarity (GHYS), HQ Simsanggre batanggipa salrangon, a·dokni Skotong Minister aro PHE Minister-ko mol·molataha.

Indake Williamnagar town-o rikenggipa dollongko ta·rake kamrangko ka·china Skotong Minister aro Williamnagar-ni MLA, GHYS-ni mol·molatani ja·man, contractor-ko didiate mikkrakataniko on·atahani gimin, Garo Hills Youth Solidarity (GHYS) kusi ong·aniko parakataha.

Ia dollongna rika cho·ani kamrangko somoi gita matchotataniara sorkarini daitoan ong·a aro jolni manderangna namroro silroroaniko ra·baani ong·a, ine janapatenba, ia matmotkugijagipa dollongara, manderangni re·a doanio nangbatgipa dollong ong·a aro ian Williamnagar town-ona re·a doanio namen seng·sotbatgipa ramaba ong·a.

Indiba kamrangko ka·anirang namen ka·siani a·sel jolo songdongenggipa manderangna namen neng·nikbeani ong·enga, ine GHYS parakataha.

Manderangni neng·nikanirangko Skotong Minister namen ma·sichakgipa aro manderangna dakchakna sikgipa saksa a·dokni Skotong dilgipa ong·a, ine GHYS, Skotong Minister-ko de·mittelataha.

East Garo Hills a·jao bang·a mongsonggipa issue-rang donga, indiba ia issue-rangoni, Rongpi dollong aro Rongbinggre dollongkon skanggipa matchote tarichengna nanga. Uni gimin, “Ia mongsonggipa kamrangko ta·rake matchotatchina jako ra·e kam ka·enggipa contractor-rangna warning issue-ko ba mikkrakataniko on·attaichina, a·dokni Skotong Minister aro Williamnagar-ni MLA-ko chinga mol·molna sika”.

Ru·uta bilsirangoni ia dollongrangko rika matchotgija donchipenggipa Dobetkolgre-ni Rongpi dollongan songni manderangna nangchongmotgipa dollong ge·a ong·a. Ia dollongko 2021 bilsion rikna a·bachengaha, indiba da·o bilsibri batangpilahaoba, ia kamrangko matchotgija galchipe donanichi, jolo songdongenggipa manderangna namen neng·nikanirangko on·enga. Rongpi dollong ian ge·sa mongsonggipa ong·a aro ia dollong gitan jolni manderang, songni manderang, mongsongbate Skul re·gipa bi·sarang, sagipa manderangko hospital-chi ra·angna nangchongmotgipa dollong ong·a. Wachini somoio chibimako batsote re·na namen neng·beani ong·a. Ia chibimako kabatgipa ge·gipin dollong dongjani a·sel, songni manderang da·o gita wachini somoio chi jrobatna aro ring chobatna namen kenbeani ong·a, ineba GHYS parakataha.

Unbaksana, Rongbinggre dollongkoba somoi gita matchotatgija, ru·uta bilsirangna donchipani a·sel jolni manderang neng·nikaniko man·enga, ine janapatenba, ia dollongko ta·rake matchotatchina contractor-ko didiatenba, mikkrakataniko on·ataha.

Rongpi aro Rongbinggre ia ge·gni dollongrangko rika cho·ani kamrang matchotkujani a·sel, jolni manderang nanga kamrangko altuae ka·na, bajar anti re·na aro namgnirangko ra·pana man·jaenga ine parakatenba, seng·gnang ia dollongrangko matchotatgenchimode, jolni manderangna tangka paisa man·ani, re·a doanirang aro bading chiwalgiparang bang·a namgnirangko man·pagenchim aro jolni manderangna namen dakchakbeani ong·genchim, ineba GHYS parakataha.

“Ia neng·nikanirangko manderangni namgnina aro a·dokni namroro silroroanina, somoi gita kamrangko matchotate ong·chongmotgen, ine chinga Skotong Minister-o ka·donga” ine GHYS parakataha.