Tura, Nov. 9, 2024: Bilsianti manirongbaenga gita ia bilsioba salgittamna ong·atenggipa chang 48-gipa Dama Bol 100-ko Doke Wangala ba Hundred Drums Wangala Festival-ni gnigipa salo ‘Rugala’ aro A·chik jatni ring·susaanirangko ong·atangaha. Ia Rugalaniko dakani miksongara, A·chik Songsarek-rangni bebe ra·a gita, a·bao man·gipa mi-misi, ta·ma taring, akaru gominda aro pilak a·bani bosturangko Pattigipa Ra·rongipa (Great Givers) Misi-Saljongko mittel mitchue, Chu jakrako Rugale, sagal amaona watatpilani ong·achim.
Indake gnigipa Wangalani salo, Meghalaya High Court-ni Registrar General E Kharumnuid, mongsonggipa sokgipa ong·e, jinmana aganprakengon, A·chik jat gimiknan Wangalani nam sikaniko on·angenba, ia Wangalanio bak ra·pana man·ahani gimin kusi ong·bee Wangala Committee-ko mittelpilangaha. Ian Pattigipa Ra·rongipako mittelpile maniani sal ong·a. An·ching pilakan Pattigipa Ra·rongipako mittelpilna nangchongmota. Ia A·chik jatni dal·begipa Wangalaniko dakmesokanichi a·doktangni aro a·song gipinni manderang baksa ku·mong nangrimani, tom·tomani aro namroro silroroaniko ra·bana man·gen ine Kharumnuid aganangaha.
Ia Wangalani gnigipa salo, dingtangmancha re·anggipa bilsio dama bol 100-ko doke Wangalaniko cheanggipa Gondenggre songni kamalrang, Rugalaniko dakdilangaha aro Wangalaona re·bagipa dingtang dingtang dilgiparang pilakan kusi ong·e bak ra·angtokaha.
Apsan salni bakon, A·chikrangni dingtang dingtang ring·anirang jekai, Harara, Nanggorere, Serejing Wal·jan, Sonatchi Boiar, Gogaiwai Gosaiwai, Ang’ Atchiram A·songtang Garo Hills, Chanchiate Aman A·songko, An·sengriri Aiao Angade, Akai Dira songjinma, Mewek Mewek Mikoa, Hai Anga Dania aro gipin ring·susaanirangko ong·atangaha.
