Uttarakhand, May 8,2025: Kobor man·soani gitade, May 8 tariko Uttarakhand a·dokni Uttarkashi a·jao donggipa Gangnani sepango helicopter kamchipe a·sel ong·anio sak 6 manderang siaha aro saksa bilongbee saknaako man·aha. Ua ning·tugipa biapo helicopter kamchipe a·sel ong·aniko nikgipa manderang bakan kobor on·ataha.
Ua helicopter Dehradun-oni Harsil helicopter onchongram biapona tourist-rangko Gangnani-ona salangengachim. Ua helicopter-o pilit-ko man·chape saksni (7) manderang gadoe re·angengachim ine aganaha. A·sel ong·ani ja·mano State Disaster Relief Force (SDRF) dolrang aro District Administration helicopter kamchipgipa biapona ta·raken sokangaha.
Helicopter kamchipanio sianggipa sakbonga (5) me·chikrangara bilsi 61 ong·gipa Kala Soni, bilsi 57 ong·gipa Vijaya Reddy, bilsi 56 ong·gipa Ruchi Aggarwal, bilsi 79 ong·gipa Radha Aggarwal aro bilsi 48 ong·gipa Vedavati Kumari ong·achim. Unbaksana, Gujarat-oni bilsi 60 ong·gipa Pilot Robin Singh-ba helicopter kamchipanio an·tangni janggiko gimaataha. A·sel ong·oani saksa mangmang tangrikgipara Andhra Pradesh-oni bilsi 51 ong·gipa Bhaskar ong·achim, uko hospital-o sanenga ine parakataha.
Saknaako man·gipa saksako hospital-o sanna bananina dakchakna aro helicopter kamchipani bidingo sandianiko dakchina BJP member Pushkar Singh Dhami administration-ko didiataha. “Anga iani bidingo official-rang baksa ong·a obostako nirokengatenga” ine Dhami aganaha.
Administration aro relief team-rang helicopter kamchipe a·sel ong·gipa biapo dongpaaha ine Darhwal-ni Divisional Commissioner Pandey parakataha.
