Tura’, Sept 27, 2024: Garo Hills-o manderangni re·a doaniko altubatatna gita Rapido, Uber aro Ola App gita dakgipa RE·NAKA App-ko re·anggipa September-ni 24 tariko, Garo Hills Day-ko manianio, Garo Hills Autonomous District Council (GHADC)-ni Deputy CEM Nikman Marak aro Forest-ni EM In-charge Ashahel D Shira a·bachengate on·angaha.
Ia project-ko Viksit Bharat-ni bak gita Tura-ni MDC Bernard N Marak aro unbaksa kam ka·rimgipa chadamberang a·bachengataha aro ian Autorickshaw aro chakka samgniko sale cha·enggipa chadamberangna kamrangko nakatate on·ani ong·aha.
Ia Re·naka App-ara GPS-chi chalaigipa App ong·a aro ia App-ni ning·o manderangko Tura-ni je biaponaba uamangni nangnikgipa biaprangona autorickshaw aro motorcycle-rangko sale on·ani donggen.
Ia kamko October-ni skanggipa antioni dipet a·bachenggen aro iana autorickshaw aro chakka samgnigipa garirangna registration-ko a·bachengatengaha ine Tura-ni MDC Bernard Marak parakataha.
Ia Re·naka App-o me·asa ba me·chik driver-rangko jakkalna man·gen ine u·iatenba, manderangko salruraanio aro ma·manti bosturangko manderangona sokatanio Tura-ni autorickshaw association aro uandakgipa gipin dolrangna dakchakanirangko on·enga ine Marak parakataha.
“Je somoioba gari salrurae on·ako nangenggipa manderangna namen dakchakani ong·gen aro chatro chatrirangba je biaponiba je somoioba autorickshaw ba motorcycle-rangko tik ka·atna man·aigen. Scooty ba motorcycle-rang donge tangka paisa kamaina sikenggipa chadamberangna ian namgni ong·gen,” ine Bernard Marak parakataha.
