Tura, Sept 8,2024: Garo Hills-ni bang·a biaprangon, Jal Jeevan Mission (JJM)-ni kamrangko ka·a tik ong·jani gimin, matnangtokengon, Tura-ni saksa Tarseng Ch. Sangma, PHE department-ni Commissioner and Secretary (CS)-na badi ka·e lekka sesoatenba, ming 5 Project-rangko kam matchotaha ine mesokahaoba, da·ona kingkingan chi man·kujaenga ine u·iataha.

West Garo Hills a·jani Dalu C&RD block-ni ning·o ga·akgipa Soropagre, Duriapara songrango JJM-ni kamko matchotaha ine mesokaha, indiba Sosotpara, Rangdapara aro Chellipara songrango JJM-ni kamko ka·kuenga ine mesokaha indiba adita jarangna kam ka·gija galchipmanaha.

Ia songrangsan ong·aija gipin songrangoba JJM-ni chiko man·jaenga ine Tarseng, uni seatgipa chittio parakataha.

“Ia daitoko ra·gipa songni saksa ong·pae, anga dingtang dingtang songrangoniko mongsongbate, Dalu jolrangoniko bang·en badi ka·anirangko man·soaha, uni gimin anga iarangni bidingo sing·sandianirangko dake badi ka·doatenga” ine chittio janapataha.

Tarseng Sangma-ni badi ka·atani gitade, kosako janapgipa songrangoni badi ka·atako man·soe, sandianiko dakaha aro bang·a songrangon chi man·gijako nikaha.

“Song damsamangba JJM-ni kamko 100% matchota dongkuja. JMM-ni kamrangko 100% matchota ba chu·sokaha ine mesokgenchimoba, nokdang ge·samangba chiko man·kuja. Indiba 2022 bilsini November 19 tariko Supervisory Officer, kam matchotani Certificate-ko on·aha” ineba Tarseng Sangma parakataha.

Kam matchotaha ine tol·gipa Certificate-ko on·ahani gimin, badi ka·e sedoatenba, iani bidingo ta·rake am·sandianiko dakchina Tarseng Sangma CS-ko didiataha.